ان فٹ شعیب ملک اور عبدالرزاق کی ٹیم میں شمولیت پر تحقیقات کا فیصلہ

لاہور: پاکستان کرکٹ بورڈ کی عبوری کمیٹی نے دورہ جنوبی افریقہ میں ان فٹ شعیب ملک اور عبدالرزاق کو شامل کرنے پر تحقیقات کا فیصلہ کر لیا۔ قذافی سٹیڈیم لاہور میں ہونیوالے پی سی سبی عبوری انتظامیہ کمیٹی کا اجلاس ہوا جس میں اہم فیصلے کئے گئے اجلاس میں دونوں ان فٹ آل راونڈرز کی ٹیم میں شمولیت کے بارے میں تحقیقات کا فیصلہ کیا گیا۔ کمیٹی کے ممبران کے مطابق دونوں کھلاڑی انجرڈ تھے تو انہیں ٹیم میں کیوں شامل کیا گیا تاہم ممبران نے اس بات کا خدشہ ظاہر کیا کہ ایسا لگتا ہے دونوں کھلاڑی کی شمولیت اثرورسوخ کی وجہ سے ہوئی ہے۔ اجلاس میں پی سی بی کے قانونی مشیر تفضل رضوی نے اراکین کو مختلف عدالتوں میں زیر سماعت پی سی بی کے متعلق کیسسز سے آگاہ کیا۔ اجلاس میں پی سی بی کے ملازمین کے متعلق فیصلے کا اختیار عبوری چیئرمین کو دے دیا گیا۔