عمران نیازی کے دور میں پاکستان کرپشن انڈیکس میں 23 نمبر اوپر چلا گیاتھا عمران نیازی بدعنوانیوں میں ملوث ہونے کی وجہ سے نااہل ہوئے: شیری رحمان

اسلام آ باد(پی پی آ ئی) وفاقی وزیر منصو بہ بندی سینیٹر شیری رحمان نے کہا ہے کہ عمران نیازی سابق آرمی چیف پر مسلسل الزام تراشی جبکہ اقتدار میں آنے کیلئے نئے آرمی چیف کو منت سماجت کر رہے ہیں، ان کو اپنے ذات کے علاوہ کسی کی پرواہ نہیں، ذاتی سیاسی مستقبل کیلئے انہوں نے اپنے ہی ارکان کا سیاسی مستقبل داؤ پر لگایا ہوا ہے۔اپنے ٹو ئٹر پیغام میں سینیٹر شیری رحمان نے کہا ہے کہ آج کل عمران خان دعویٰ کر رہے کہ ان کی حکومت میں کرپشن کا کوئی کیس نہیں تھا، جبکہ آغاز سے اختتام تک تحریک انصاف کی حکومتیں کرپشن اسکینڈلز کے زد میں رہی۔ عمران خان کے دور میں پاکستان کرپشن انڈیکس میں 23 نمبر اوپر چلا گیا پھر بھی عمران خان اپنی حکومت کی کرپشن کا دفاع کرتے رہے۔انہوں نے کہا کہ تحریک انصاف کی وفاقی اور صوبائی حکومتوں کے کرپشن اسکینڈلز کی تویل فہرست موجود ہے۔ یہ خود بدعنوانیوں میں ملوث ہونے کی وجہ سے نااہل ہوئے۔ سو چوہے کھا کر بلی حج کو چلی۔بیرونی سازش کا بیانیہ ناکام ہونے کہ بعد ایک بار پھر اپنے کرپشن کے کھوکھلے بیانیہ زندہ کرنے کی کوشش کر رہے ہیں۔