ملک میں پٹرولیم مصنوعات کی قلت کا خدشہ، آئل کمپنیز نے حکومت کو خبردار کر دیا

اسلام آباد(پی پی آئی) ملکی معاشی صورتحال کے باعث بینکوں کی جانب سے ایل سیز نہ کھولے جانے پر ملک میں پٹرول کا بحران پیدا ہونے کا خدشہ ظاہر کیا جا رہا ہے۔ میڈیا ذرائع کے مطابق آئل کمپنیز ایڈوائزری کونسل (او سی اے سی)نے ملک میں تیل کے بحران کی گھنٹی بجا دی ہے، او سی اے سی نے معاملے کی حساسیت پر حکومت کو خط بھی لکھ دیا ہے، خط میں کہا گیا ہے کہ بروقت ایل سیز نہ کھلنے سے ملک میں تیل کے بحران کا خدشہ ہے، بروقت ایل سیز کو یقینی بنانے کے لیے وزیر خزانہ اور وزیر پیٹرولیم کردار ادا کریں۔خط میں کہا گیا ہے کہ بینکوں کی جانب سے ایل سیز نہ کھلنے سے کچھ آئل کارگوز منسوخ ہوچکے ہیں اور ایل سیز نہ کھلنے سے تیل کی سپلائی میں تعطل پیدا ہورہا ہے جسے فوری طور پر ختم کرنا ناگزیر ہے۔مزید کہا گیا ہے کہ ملکی ضروریات پوری کرنے کے لیے ایک ارب تیس کروڑ ڈالرمالیت کا تیل درآمد کیا جاتا ہے، ملک میں ماہانہ 4 لاکھ 30 ہزار میٹرک ٹن پٹرول 2 لاکھ میٹرک ٹن ڈیزل درآمد کیا جاتا ہے، ایک مرتبہ سپلائی چین متاثر ہونے کے بعد بحالی میں 6 سے 8 ہفتے لگیں گے۔