برینڈن میک کولم ٹی ٹوئنٹی میں 2ہزار رنز بنانے والے پہلے کھلاڑی بن گئے

چٹاگانگ: نیوزی لینڈ کے کپتان برینڈن مک کولم نے نیدرلنڈ کے خلاف میچ وننگ اننگز کھیلتے ہوئے ٹی ٹوئنٹی کرکٹ میں 2ہزار رنز بنانے والے دنیا کے پہلے بیٹسمین بن گئے۔ کیوی کپتان نے ورلڈ ٹی ٹوئنٹی میں ہالینڈ کے خلاف شاندار65رنز بنائے اورجب برینڈن نے 21واں رن بنایاتو ٹی ٹوئنٹی کیریئر میں ان کے 2ہزار رنز مکمل ہوگئے۔ میک کولم نے 67ٹی ٹوئنٹی میچز میں دوہزار رنز مکمل کرلئے۔ وہ مختصر فارمیٹ کی انٹرنیشنل کرکٹ میں دو سنچریاں بنانے والے اب تک دنیا کے واحد بیٹسمین ہیں۔انھوں نے 12نصف سنچریاں بھی بنا رکھی ہیں۔ اس طرز کی کرکٹ میں برینڈن مک کولم کابہترین اسکور 123 ہے۔کیوی کپتان ٹی ٹوئنٹی کرکٹ میں 85 چھکے اور ایک سو92 چوکے لگاچکے ہیں۔ٹی ٹوئنٹی ورلڈ کپ کے اہم میچ میں نیوزی لینڈ نے نیدر لینڈ کو 6وکٹوں سے شکست دے دی۔