عرب امارات کی پاکستان کے حوالے سے آئی ایم ایف کو یقین دہانی

 اسلام آباد (پی پی آئی) متحدہ عرب امارات (یواے ای) کے سفیر نے پاکستان کو درپیش ساڑھے 6 ارب ڈالر کے بیرونی فنانسنگ گیپ پر عالمی مالیاتی ادارے (آئی ایم ایف) کو یقین دہانی کرا دی۔پی پی آئی کے مطابق پاکستان کو درپیش ساڑھے 6 ارب ڈالر کے بیرونی فنانسنگ گیپ کے معاملے پر آئی ایم ایف مشن چیف نے متحدہ عرب امارات کے سفیر سے ملاقات کی تھی۔جس میں پاکستان کے لیے بیرونی فنانسنگ گیپ پورا کرنے سے متعلق امور پر تبادلہ خیال کیا گیا۔ذرائع کا کہنا ہے کہ یو اے ای کے سفیر نے آئی ایم ایف مشن چیف کو پاکستان کے معاشی استحکام کے لیے کردار ادا کرنے کی یقین دہانی کرائی کیونکہ آئی ایم ایف مشن پاکستان کی بیرونی فنانسنگ کے لیے تصدیق کر رہا ہے۔ذرائع کے مطابق پاکستان کو ساڑھے 6 ارب ڈالر کے بڑے بیرونی فنانسنگ گیپ کا سامنا ہے جس کے باعث نگران حکومت نے سعودی عرب اور یو اے ای سمیت دوست ممالک سے پھر رجوع کا فیصلہ کیا ہے۔ذرائع نے بتایا کہ اسلامی ترقیاتی بینک، ایشیائی ترقیاتی بینک اور عالمی بینک سے بھی مدد لی جائے گی جبکہ کرنٹ اکاونٹ خسارے میں کمی کے ذریعے مالی گیپ کم ہونے کا امکان ہے۔پاکستان اور آئی ایم ایف کے درمیان شرح سود مزید 22 فیصد سے زیادہ نہ بڑھانے پر اتفاق ہو گیا ہے۔