بیلاروس کے صدر پاکستان آرہے ہیں، اسلام آباد کو ہر صورت محفوظ رکھنا ہے:محسن نقوی

اسلام آباد(پی پی آئی) وزیرداخلہ محسن نقوی نے کہا ہے کہ اسلام آباد کے امن و امان کو خراب کرنیوالے ہر شخص کو گرفتار کرنا ہے۔امن وامان کو قائم رکھنے اور شہریوں کی جان و املاک کی حفاظت کیلئے ہر ممکن اقدامات اٹھائے جائیں گے۔وزیرداخلہ نے پولیس لائنز میں اہلکاروں سے خطاب کرتے ہوئے امن کے قیام کیلئیاسلام آباد پولیس کی جانفشانی کی تعریف کی، محسن نقوی نے کہا کہ بیلاروس کے صدروفدکے ہمراہ پاکستان آرہے ہیں، اس کے پیش نظر ہم نے اسلام آباد شہر کو ہر صورت محفوظ رکھنا ہے۔ اسلام آباد کے امن و امان کو خراب کرنے اورقانون ہاتھ میں لینے والے کسی بھی شخص کو واپس نہیں جانے دینا۔ وفاقی وزیر داخلہ نے اہلکاروں کو ہدایات جاری کرتے ہوئے کہا کہ وہ اپنی پیشہ وارانہ ذمہ داریاں پوری احتیاطی سے سرانجام دیں۔ محسن نقوی نے اپنے خطاب میں کہا کہ امن وامان کو قائم رکھنے اور شہریوں کی جان و املاک کی حفاظت کے لیے ہر ممکن اقدامات اٹھائے جائیں گے۔