پاک فوج ہمارا فخرہے،شہداکی یادگاروں کو نقصان پہنچانے والے ملک دشمن ہیں: گورنر پنجاب

لاہور،بنوں (پی پی آئی) گورنر پنجاب سردار سلیم حیدر خان نے بنوں کے علاقے خیبر میں خوراج کے خلاف آپریشن کے دوران جام شہادت نوش کرنے والے کیپٹن زوہیب الدین کے گھر جا کر اہل خانہ سے اظہار تعزیت اور فاتحہ خوانی کی، گورنر پنجاب نے ملک و قوم کیلئے جان کا نذرانہ پیش کرنے پر شہید کیپٹن کو خراج عقیدت پیش کیا۔گورنرپنجاب سردار سلیم حیدر خان نے اس موقع پر گفتگو کرتے ہوئے کہاکہ ملک پر اپنی جان نچھاور کرنے والے بہادر جوان قوم کا فخر ہیں، شہداکا مقدس لہو رائیگاں نہیں جائے گا، شہدااور ان کے ورثاپوری قوم کا فخر ہیں، پاک فوج کے ایک بہادر شہید آفیسر کے اہل خانہ سے ملنا میرے لئے اعزاز کی بات ہے جب کہ شہداکی یادگاروں کو نقصان پہنچانے والے ملک کے دشمن ہیں۔انہوں نے کہا کہ شہداکی قربانیاں ملکی سلامتی کی بنیاد ہیں، شہداکے خاندانوں کے ساتھ کھڑے ہیں، سرحدوں پر ملک و قوم کی حفاظت پر کھڑے پاک فوج کے جوانوں کو سلام پیش کرتا ہوں، ہمارے شہداکی یاد گاروں کو نقصان پہنچانے والے ملک کے دشمن ہیں۔سردار سلیم حیدر کا کہنا تھا کہ پاک فوج ہمارا فخر ہے، دہشتگردی کی جنگ میں اپنی فورسز کے ساتھ ہیں، پاک فوج کی تنصیبات، شہداکی یاد گاروں کی بے حرمتی اور زہر اگلنے والوں کی جتنی مذمت کی جائے کم ہے۔