خواجہ آصف نے افغان قائم مقام نائب وزیرخارجہ کے الزامات مسترد کردیئے

ٓاسلام آباد (پی پی آئی) وزیردفاع خواجہ محمد آصف نے افغانستان کے قائم مقام نائب وزیرخارجہ ستانکزئی کے بے بنیاد اور من گھڑت الزامات کو واضح طور پر مسترد کر دیا ہے۔سوشل میڈیا پلیٹ فارم ایکس پر اپنی پوسٹ میں انہوں نے کہا کہ اقوام متحدہ کی مانیٹرنگ ٹیم کی تازہ ترین رپورٹ کے مطابق افغانستان میں ٹی ٹی پی، القاعدہ، آئی ایس کے پی، ای ٹی آئی ایم اورآئی ایم یو سمیت دو درجن سے زائد دہشت گرد گروپ سرگرم عمل ہیں۔انہوں نے کہا کہ افغانستان 2024 سے ISKPکی بھرتی اور سہولت کاری کا مرکز رہاہے۔وزیر دفاع نے افغان عبوری حکام پر زور دیا کہ وہ دہشت گردی کے بنیادی ڈھانچے کو ختم کرنے اور افغان سرزمین کو دوسرے ممالک کے خلاف استعمال ہونے سے روکنے کیلئے قابلِ عمل اور قابلِ تصدیق اقدامات کرتے ہوئے عالمی برادری کو دی گئی یقین دہانیوں کو پوراکریں۔