اوکاڑہ میں کم عمر یتیم بھتیجے کے قتل کیس میں اس کا حقیقی تایا گرفتار

اوکاڑہ، 13مئی (پی پی آئی) تھانہ حویلی لکھا کی حدود میں ایک افسوسناک واقعہ پیش آیا جہاں دس سالہ یتیم طالب علم علی اکبر کے قتل کے الزام میں اس کا حقیقی تایا گرفتار کر لیا گیا۔پولیس کے مطابق، ملزم عمران نے تین ایکڑ زرعی زمین کے لالچ میں آ کر بچے کو گلہ دبا کر قتل کر دیا۔ قتل کے بعد ملزم نے نعش کو سہاگ نہر میں پھینک دیا۔پولیس اور ریسکیو کا عملہ نہر سے نعش برآمد کرنے میں مصروف ہے۔ ملزم کو حراست میں لے کر قانونی کارروائی کا آغاز کر دیا گیا ہے۔پولیس کا کہنا ہے کہ کسی کو بھی ناحق قتل کرنے والا قانون کی گرفت میں ہوگا۔