عالمی ایام ضامن منانے کے لیے ملک کے تمام صوبوں میں کنوینر مقرر

راولپنڈی،5مئی (پی پی آئی) تحریک نفاذ فقہ جعفریہ پاکستان کی ایام ضامن کمیٹی کا ایک اہم اجلاس مرکزی کنوینر پروفیسر حسن نقوی کی صدارت میں مرکزی دفتر میں منعقد ہوا۔ اجلاس میں 9 تا 11 ذیقعدہ قائد ملت جعفریہ آغا سید حامد علی شاہ موسوی کے قائم کردہ عالمی ایام ضامن منانے کے انتظامات کے لیے ملک کے تمام صوبوں میں کنوینرز مقرر کیے گئے۔تفصیلات کے مطابق، ذوالفقار علی راجہ کو فیڈرل کیپٹل اسلام آباد کے لیے، علامہ باقر علی نقوی کو پنجاب کے لیے، غضنفر علی شاہ ایڈوکیٹ کو خیبر پختونخوا کے لیے، علامہ علی عرفان عابدی کو سندھ کے لیے، پروفیسر ثمر الحسن غفاری کو گلگت بلتستان کے لیے، اور سید ساجد حسین کاظمی کو آزاد کشمیر کے لیے کنوینر مقرر کیا گیا۔پروفیسر حسن نقوی نے اجلاس سے خطاب کرتے ہوئے کہا کہ ایام ضامن کے موقع پر ملک بھر کی تمام مساجد اور امام بارگاہوں میں محافل، کانفرنسوں، سیمیناروں اور تہنیتی تقریبات کا انعقاد کر کے سیرت امام علی رضا علیہ السلام کو اجاگر کیا جائے گا۔ انہوں نے کہا کہ عالم اسلام کا اتحاد امت مسلمہ کے بچاؤ کی ضمانت ہے، اور پاکستان کو اندرونی و بیرونی دشمنوں سے نمٹنے کے لیے عملی اتحاد و یکجہتی کی اشد ضرورت ہے۔انہوں نے مزید کہا کہ مشاہیر اسلام کے ایام منانے کا مقصد دنیا کو خانوادہ رسالت کے ہدایت کے میناروں سے روشناس کرانا ہے، جن کی قربانیوں پر دین اسلام نازاں ہے۔ پروفیسر نقوی نے زور دے کر کہا کہ حضرت امام علی بن موسیٰ الرضا نے دنیائے علم اور زہد و تقویٰ کو زینت بخشی، اور ان کی تعلیمات کی پیروی کر کے دنیا کو امن کا گہوارہ بنایا جا سکتا ہے۔انہوں نے اس عہد کا اظہار کیا کہ امام ضامن حضرت علی بن موسیٰ الرضا علیہ السلام کی سیرت و کردار اور تعلیمات پر عمل کرتے ہوئے مظلومین کی نصرت و حمایت کے لیے عملی جدوجہد جاری رکھی جائے گی۔ پروفیسر نقوی نے اہل وطن سے اپیل کی کہ ایام ضامن کے پروگراموں میں بھارت کے جارحانہ ہتھکنڈوں کی مذمت اور افواجِ پاکستان کے ساتھ اظہار یکجہتی کیا جائے، اور محافل میں عالم اسلام کی سربلندی کے لیے دعائیں کی جائیں۔