ریان ہیرس ،پیٹرسڈل بھارت کے خلاف دوسرے ٹیسٹ سے باہر

برسبین:آسٹریلیا کے فاسٹ بولرریان ہیرس اورپیٹرسیڈل بھارت کے خلاف دوسرے ٹیسٹ سے باہر ہوگئے۔ ریان ہیرس معمولی انجری کا شکار ہوگئے ہیں جبکہ پیٹرسڈل کو پہلے ٹیسٹ کے کامیاب بولنگ دستے سے باہر کردیا گیاہے۔ ان کی جگہ جوش ہیزل ووڈ اور مچل اسٹارک کو ٹیم میں شامل کرلیا گیاہے۔ مچل اسٹارک نے گزشتہ ماہ ابو ظہبی میں پاکستان کے خلاف ہاری ہوئی بازی میں آسٹریلیا کی نمائند گی کی تھی ،ہیزل ووڈ کو لمبے عرصے بعد ٹیم میں دوبارہ بلالیا گیا ہے۔ آسٹریلیا اور بھارت کے درمیان دوسرا ٹیسٹ آج کھیلا جارہاہے۔

دھونی دوسرے ٹیسٹ میں بھارت کے کپتان ہوں گے

برسبین: مہندراسنگھ دھونی آسٹریلیا کے خلاف دوسرے ٹیسٹ سے بھارتی ٹیم کی کپتانی دوبارہ سنبھال لیں گے۔ بھارتی کپتان دھونی زخمی ہوکر پہلے ٹیسٹ سے باہرہوگئے تھے انھوں نے آسٹریلیا میں موجود ٹیم کو بعد میں جوائن کرلیا۔ ان کی غیرموجودگی میں ٹیم کی کپتانی ویرات کوہلی نے کی تھی،جس میں کوہلی نے کپتان کی حیثیت سے دونوں اننگز میں سنچریاں بنائی تھیںتاہم ٹیم کو 48رنز کی شکست سے بچا نہیں سکے تھے۔ دھونی نے ویرات کوہلی کی بہترین کپتانی کی تعریف کرتے ہوئے کہا کہ انھوں نے شان دار کارکردگی کا مظاہرہ کیا، دھونی بھارت سے باہر ٹیسٹ کرکٹ میں کپتانی کی حیثیت سے کارکردگی بہت خراب ہے ،ان کی کپتانی میں بھارت سے باہر کھیلے گئے 28میچوں میں سے صرف 6میچوں میں کامیابی نصیب ہوئی ہے۔ رواں سیریز میں آسٹریلیا کو ایک صفر کی برتری حاصل ہے دوسراٹیسٹ آج برسبین میں کھیلا جارہاہے۔

چین کے عالمی اور اولمپک چمپین تیراک سن یانگ پر تین ماہ کی پابندی

بیجنگ:چین کے عالمی اور اولمپک چمپین تیراک سن یانگ کو ڈوپ ٹیسٹ مثبت آنے پر تین ماہ کی پابندی عائد کردی گئی۔چین کی اینٹی ڈوپنگ ایجنسی نے کہا ہے کہ سن یانگ کارواں برس مئی میں نیشنل سوئمنگ چمپیئن شپ کے دوران ڈوپ ٹیسٹ کیا گیا تھاجس کانتیجہ مثبت آگیا تھا، چینی ایجنسی کا کہنا ہے کہ ورلڈ ڈوپنگ ایجنسی کی جانب سے اسی سال ممنوعہ قرار دی جانے والی ادویات استعمال کی تھیں ۔ واضح رہے اسے قبل1994اور2000میں چینی تیراک ممنوعہ ادویات کے استعمال پر پابندی کا شکار ہوگئے تھے۔

آسٹریلیا کے اسٹیواسمتھ کی بھارت کے خلاف پہلے ٹیسٹ میںشرکت مشکوک

سڈنی:آسٹریلیا کے آل راﺅنڈراسٹیو اسمتھ کو زخمی ہونے کے باعث شیفلڈ شیلڈ میچ سے باہر کردیا گیا ہے جبکہ بھارت کے خلاف پہلے ٹیسٹ میں شرکت بھی مشکوک ہوگئی ہے۔ کرکٹ آسٹریلیا نے بھارت کے خلاف4دسمبر سے شروع ہونے والے پہلے ٹیسٹ کے لیے کھلاڑیوں کا اعلان کردیا جس میں زخمی کپتان مائیکل کلارک اور زخمی اسٹیو اسمتھ کو بھی شامل کیا گیاہے،اسٹیو اسمتھ جنوبی افریقا کے خلاف پانچویں میچ میں زخمی ہوگئے تھے، میچ میں آسٹریلیانے تین وکٹوں سے کامیابی حاصل کی تھی۔ آسٹریلیا کرکٹ ٹیم کے میڈیکل چیف آفیسر جان آرکرڈ نے کہا کہ اسمتھ معمولی زخمی ہیں جس کے باعث انھیں شیفلڈ شیلڈ میچ میں شامل نہیں کیا گیا ہے تاہم ان کی فٹنس بہترہور ہی ہے اس لیے انھیں بھارت کے خلاف میچ کے لیے ممکنہ کھلاڑیوں میں شامل کیا گیاہے حتمی فیصلہ میچ سے قبل فٹنس ٹیسٹ کی بنیاد پرہوگا۔

سری لنکا کاانگلینڈ کے خلاف ابتدائی تین ون ڈے میچوں کے لیے ٹیم کااعلان

کولمبو:سری لنکا نے انگلینڈ کے خلاف ون ڈے سیریز کے ابتدائی تین میچوں کے لیے ٹیم کا اعلان کردیا۔ سری لنکا اور انگلینڈ کے درمیان ون ڈے سیریز میں سات میچ کھیلے جائیں گے جن کا آغاز کل26نومبر سے ہوگا۔ انگلینڈ کی ٹیم رواں برس ون ڈے میںپے در پے شکستوں سے دوچار رہی ہے۔ سری لنکن ٹیم کوحال ہی میں بھارت کے خلاف پانچ میچوں کی سیریز میں تاریخی وائٹ واش کا سامنا کرنا پڑا تھا۔سری لنکن ٹیم میں اینجیلو میتھیوز(کپتان)،کمار سنگاکارا،مہیلا جے وردھنے، تلکارتنے دلشان، کوشل پریرا(وکٹ کیپر)، لہیرو تھیما نے، جیون مینڈس، تھیلان کنڈمبے، رنگنا ہیراتھ، دلروان پریرا، اجانتا مینڈس، شمیندا ایرانگا، دھمیکا پرشاد، تھیسارا پریرا اور لہیرو گمیج شامل ہیں ۔

کرکٹ آسٹریلیا نے ویسٹرن آسٹریلیا کے ولیم بوسسٹو کو بولنگ سے معطل کردیا

پرتھ:کرکٹ آسٹریلیا نے ویسٹرن آسٹریلیا کے پارٹ ٹائم آف اسپنر ولیم بوسسٹو کو مشکوک ایکشن کی شکایت پر بولنگ کرنے سے پابندی لگادی۔ ولیم بوسسٹو آسٹریلیا کرکٹ بورڑ کے زیر جاری فیوچر لیگ ٹورنامنٹ کے 30اکتوبر کو کھیلے گئے میچ میں وکٹوریا کے خلاف بولنگ کے دوران فیلڈ امپائر نے مشکوک ایکشن کی نشان دہی کی تھی جس کے بعد ان کا برسبین میں ٹیسٹ کیا گیا جہاں ٹیسٹ مثبت آنے پر کرکٹ آسٹریلیا نے انھیں بولنگ کرنے پر پابندی عائد کردی۔21سالہ بوسسٹو کو بولنگ کرنے کے لیے ایک اور تجزیاتی عمل سے گزرنا پڑے گا جس کے لیے انھیں90دنوں کے اندر درخواست دینا پڑے گی۔