کراچی(پی پی آ ئی)کراچی کی مقامی عدالت نے مرحوم عامر لیاقت حسین کی ویڈیو لیک کیس میں ان کی بیوہ دانیہ شاہ کو عدالتی ریمانڈ پر جیل بھیج دیا۔ایف آئی اے نے پی ٹی آ ئی رہنما مر حوم عامر لیاقت کی ویڈیو لیک کیس میں ان کی بیوہ دانیہ شاہ کو جوڈیشل میجسٹریٹ کراچی شرقی کے روبرو پیش کیا۔دوران سماعت تفتیشی افسر نے یو ایس بی میں ویڈیو شواہد پیش کیے، جج نے کمرہ عدالت میں لیپ ٹاپ پر ویڈیو کا جائزہ لیا۔دانیہ شاہ نے کہا کہ ان کا لیک کی گئی ویڈیو سے کوئی تعلق نہیں اور نہ ہی وہ ویڈیو انہوں نے بنائی ہے۔عامر لیاقت کی سابق اہلیہ بشریٰ اقبال کے وکیل نے عدالت کو بتایا کہ دانیہ کی آواز بھی ویڈیو میں شامل ہے، کئی انٹرویوز میں دانیہ نے ویڈیو بنانے کا اعتراف بھی کیا ہے۔
عدالت نے ریمارکس دیے کہ تفتیش ہوگی تو حقائق سامنے آجائیں گے۔جوڈیشل مجسٹریٹ نے دلائل سننے کے بعد دانیہ شاہ کو عدالتی ریمانڈ پر جیل بھیجتے ہوئے ایف آئی اے کو 14 روز میں چالان جمع کرانے کا حکم دے دیا۔عامر لیاقت کی بیٹی نے دانیہ شاہ کے خلاف ویڈیو بنانے اور لیک کرنے کی شکایت درج کرائی تھی،جس پر ایف آئی اے کراچی کی نے پندرہ دسمبر کو دانیا شاہ کو لودھراں سے گرفتار کیا تھا۔