عمر جمالی کا آئندہ انتخابات پی ٹی آئی کے ٹکٹ پر لڑنے کا اعلان

جعفرآباد(پی پی آئی)وزیراعلیٰ بلوچستان کے مشیر برائے توانائی عمر جمالی نے آئندہ انتخابات پی ٹی آئی کے ٹکٹ پر لڑنے کا اعلان کر دیا۔منگل کے روز عمر جمالی نے میڈیا سے گفتگو میں کہا کہ دوسری کسی سیاسی جماعت میں شمولیت کی باتیں افواہ کے سوا کچھ نہیں۔ اْن کا کہنا تھا کہ تحریک انصاف کا رکن صوبائی اسمبلی ہوں کسی دوسری جماعت میں شامل نہیں ہو رہا۔پی پی آئی کے مطابق انہوں نے کہا کہ دوسری جماعت کے دوست رابطہ کرکے اور ملاقات کرنے آتے ہیں، ہم بلوچ اور روایتی لوگ ہیں مہمانوں کو عزت دینے والے ہیں۔ مگر اپنے فیصلے خود کرینگے جو بڑوں کا فیصلہ ہوگا وہی میرا فیصلہ ہوگا۔عمر جمالی کا مزید کہنا تھا کہ عمران خان نے پنجاب اور کے پی کے اسمبلیاں تحلیل کرکے اچھا فیصلہ کیا۔ موجودہ حالات میں عام انتخابات میں تاخیر سے مسائل مزید بڑھ جائیں گے۔