اسلام آباد (پی پی آئی) آفیشل سیکرٹ ایکٹ کے تحت قائم خصوصی عدالت نے سائفر کیس میں چیئرمین پاکستان تحریک انصاف اور وائس چیئرمین پی ٹی آئی شاہ محمود قریشی پر فرد جرم کیلئے 17 اکتوبر کی تاریخ مقرر کردی۔پی پی آئی کے مطابق خصوصی عدالت کے جج ابوالحسنات ذوالقرنین نے اڈیالہ جیل میں سائفر سے متعلق کیس کی سماعت کی، سابق وزیراعظم اور شاہ محمود قریشی کو عدالت کے روبرو پیش کیا گیا، سپیشل پراسیکیوٹر ذوالفقار نقوی اور وکیلِ صفائی سلمان صفدر بھی عدالت پیش ہوئے۔اس موقع پر ایف آئی اے کی ٹیم اور تفتیشی افسر بھی چالان کی نقول لے کر اڈیالہ جیل پہنچ گئے اور چیئرمین پی ٹی آئی کے وکلا میں چالان کی نقول تقسیم کیں۔دوران سماعت پراسیکیوٹر ذوالفقار عباس نقوی نے عدالت کو بتایا کہ مقدمے کی مکمل نقول نہیں دے سکتے، تاہم جو ضروری نقول تھیں وہ فراہم کر دی گئی ہیں۔ بعد ازاں عدالت نے سرکاری گواہان کی طلبی کے نوٹس جاری کرنے کی ہدایت کی اور چیئرمین پی ٹی آئی اور شاہ محمود قریشی پر فردِ جرم عائد کرنے کی تاریخ دیتے ہوئے 17 اکتوبر تک سماعت ملتوی کر دی۔سماعت کے بعد جج ابوالحسنات ذوالقرنین اور پراسیکیوٹر ذوالفقار عباس نقوی اور ایف آئی اے کی ٹیم اڈیالہ جیل سے واپس روانہ ہوگئی۔
Next Post
چیئرمین پی ٹی آئی سے قانونی ٹیم کی جالیوں سے مختصر ملاقات
Mon Oct 9 , 2023
اسلام آباد (پی پی آئی)آفیشل سیکرٹ ایکٹ کے تحت قائم خصوصی عدالت میں ملاقات کیلئے سابق وفاقی وزیر خارجہ شاہ محمود قریشی کی بیٹی اور بیٹا زین قریشی بھی اڈیالہ جیل پہنچے۔پی پی آئی کے مطابق چیئرمین پی ٹی آئی سے قانونی ٹیم کی جالیوں سے مختصر ملاقات کروائی گئی۔