کینیڈا میں پی آئی اے کی ایک اور فضائی میزبان لاپتہ، محکمانہ کارروائی کا آغاز

کراچی(پی پی آئی)پاکستان کی قومی ایئرلائن کی ٹورنٹو فلائٹ پر تعینات ایئر ہوسٹس مبینہ طور پر لاپتہ ہو گئی ہیں۔بدھ کو پاکستان انٹرنیشنل ایئرلائنز کے ترجمان نے ایک بیان میں کہا ہے کہ فائزہ مختار نامی فضائی میزبان اسلام آباد سے ٹورنٹو کی پرواز نمبر پی کے 781 پر تعینات تھیں۔بیان میں کہا گیا ہے کہ مبینہ طور پر سلپ ہو جانے والی خاتون کو ٹورنٹو سے کراچی کی پرواز 784 پر فرائض انجام دینا تھے۔ ترجمان نے کہا کہ فائزہ مختار کے مبینہ سلپ ہونے کا علم واپسی کی پرواز کے لیے عملے کے ساتھ رپورٹ نہ کرنے پر ہوا۔فائزہ مختار کے خلاف محکمانہ تادیبی کارروائی کا آغاز کر دیا گیا ہے۔انتظامیہ کے پاس موجود فضائی میزبانوں کے حلف ناموں کے ذریعے وفاقی تحقیقاتی ادارے (ایف آئی اے) سے بھی کارروائی کے لیے رابطے کیا جائے گا۔