بھارت نے اظہار رائے سمیت کشمیریوں کے تمام حقوق سلب کر رکھے ہیں: ایڈوکیٹ عبدالرشید منہاس

سری نگر/مقبوضہ کشمیر(پی پی آئی)مقبوضہ جموں وکشمیر میں کل جماعتی حریت کانفرنس کے ترجمان ایڈوکیٹ عبدالرشید منہاس نے ایک بیان میں کہا کہ بھارت نے اظہار رائے کی آزادی سمیت کشمیریوں کے تمام حقوق سلب کر رکھے ہیں۔انہوں نے کہا کہ ملازمین کو مسلسل دھمکیاں دی جاتی ہیں کہ اگر انہوں نے قابض حکام کی کشمیر دشمن پالیسیوں کے خلاف آواز اٹھائی تو انہیں سنگین نتائج بھگتنا ہوں گے۔ترجمان نے کہا کہ ہندوتوا جماعتوں بی جے پی اور آر ایس ایس نے کشمیریوں سے انکا سب کچھ چھیننے پر تلی ہوئی ہیں۔ انہوں نے کہا کہ یہ جماعتیں کشمیریوں کو اپنے ہی وطن میں اجنبی بنانے کے ایک منصوبہ بند سازش پر عمل پیرا ہیں۔