پنجاب میں اجتماعی شادیوں کے دوسرے مرحلے کیلئے رجسٹریشن کا آغاز

ؒؒلاہور، ۹فروری (پی پی آئی) پنجاب دھی رانی پروگرام کے پہلے مرحلے کی کامیاب تکمیل کے بعد پندرہ سو اجتماعی شادیوں کے دوسرے مرحلے کیلئے رجسٹریشن کا آغاز ہو گیا ہے۔اس حوالے سے درخواستیں آن لائن پورٹل cm.punjab.gov.pk پر یا متعلقہ ضلع کے ڈپٹی ڈائریکٹر سوشل ویلفیئر کے دفتر میں جمع کرائی جاسکتی ہیں۔اس پروگرام کے حوالے سے معلومات فراہم کرنے کیلئے ہیلپ لائن ایک تین ایک دو پہلے ہی جاری کردی گئی ہے۔پروگرام کے تحت پنجاب حکومت دلہن، دلہا اور ان کے قریبی رشتہ داروں کیلئے کھانا مہیا کرے گی۔نئے شادی شدہ جوڑے کو ضروری فرنیچر اور کپڑوں کے علاوہ اے ٹی ایم کارڈ کے ذریعے ایک لاکھ روپے کی سلامی بھی دی جائے گی۔وزیراعلی مریم نواز نے اس حوالے سے کہا کہ معاشرے کے مستحق اور محروم طبقات کے مسائل کا احساس کرنا حکومت کی ذمہ اری ہے جو پوری کی جائے گی۔