دکی میں غیر رجسٹرڈ کوئلے کی کانوں کی فوری طور پر رجسٹریشن کا حکم

کوئٹہ، 11 فروری (پی پی آئی) وزیراعلیٰ بلوچستان میر سرفراز بگٹی نے منگل کے روز کہا ہے کہ دکی مائنز کے علاقے میں پائیدار امن برقرار رکھنے کے لیے ایف سی، پولیس اور لیویز فورس کا رابطہ ضروری ہے۔ ان خیالات کا اظہار انہوں نے وزیراعلیٰ سیکرٹریٹ میں دکی مائنز ایریا میں سکیورٹی انتظامات کا جائزہ لینے کے حوالے سے منعقدہ اجلاس کی صدارت کرتے ہوئے کیا۔ بگٹی نے کہا کہ دکی کے علاقے مائنز میں امن و امان کی صورتحال بحال کرنے کے لیے جامع طریقہ کار وضع کیا جا رہا ہے۔ متعلقہ حکام کو غیر رجسٹرڈ کوئلے کی کانوں کی فوری طور پر رجسٹریشن کروانے کی ہدایت کرتے ہوئے انہوں نے کہا کہ مائنز کی رائلٹی ریٹس پر نظرثانی کرکے حاصل شدہ ریونیو کو علاقے کی ترقی کے لیے خرچ کیا جائے۔ وزیراعلیٰ بلوچستان نے انسپکٹر جنرل پولیس بلوچستان کو ہدایت کی کہ دکی مائنز ایریا کی سیکیورٹی کے لیے میرٹ پر 200 اہلکار تعینات کیے جائیں۔ اجلاس میں وزیر برائے مائنز اینڈ منرلز ڈویلپمنٹ میر شعیب نوشیروانی، چیف سیکرٹری بلوچستان شکیل قادر خان، وزیراعلیٰ بلوچستان کے پرنسپل سیکرٹری بابر خان، ایڈیشنل چیف سیکرٹری محکمہ داخلہ شہاب الدین، انسپکٹر جنرل پولیس بلوچستان معظم جاہ انصاری اور دیگر حکام نے شرکت کی۔