35ویں نیشنل گیمز یکم مئی سے کراچی میں جبکہ تھر جیپ ریلی 10 اپریل سے مٹھی میں ہوگی

کراچی،7مارچ (پی پی آئی)سندھ حکومت نے اعلان کیا ہے کہ 35ویں نیشنل گیمز یکم مئی سے 9 مئی تک کراچی میں منعقد ہوں گے جبکہ تھر جیپ ریلی 10 اپریل سے 13 اپریل تک مٹھی میں ہوگی۔ نیشنل گیمز کی افتتاحی اور اختتامی تقریبات میں پاکستان کے صدر اور وزیر اعظم شرکت کریں گے۔ یہ مقابلے کراچی کے 21 مقامات پر ہوں گے، جن میں 34 کھیل شامل ہیں اور 10,000 کھلاڑی اور آفیشلز حصہ لیں گے۔” نیشنل گیمز میں سندھ، پنجاب، بلوچستان، خیبرپختونخوا، اسلام آباد، آزاد جموں و کشمیر اور گلگت بلتستان کی ٹیمیں شرکت کریں گی۔ اس کے علاوہ پاکستان آرمی، ایئر فورس، نیوی، واپڈا، ریلوے، پولیس اور ہائر ایجوکیشن کمیشن کی ٹیمیں بھی حصہ لیں گی۔ 18 سال بعد نیشنل گیمز سندھ میں منعقد ہو رہے ہیں۔۔ افتتاحی اور اختتامی تقریبات عبدالستار ایدھی ہاکی اسٹیڈیم میں ہوں گی۔”تھر جیپ ریلی میں 10 کیٹیگریز اور 60 ڈرائیورز شرکت کریں گے۔ ریلی میں موٹر سائیکل کیٹیگری بھی شامل ہے۔” تھر ریلی  فروری میں ہونی تھی لیکن رمضان کی وجہ سے ملتوی کر دی گئی۔ سندھ حکومت پہلے بھی دو بار اس ایونٹ کا انعقاد کر چکی ہے لیکن گزشتہ سال انتخابات کی وجہ سے منسوخ کر دیا گیا تھا۔