وزیر اعظم کا عوام کے لیے بہتر صحت کی سہولیات کا عزم

اسلام آباد، 7اپریل (پی پی آئی)وزیر اعظم محمد شہباز شریف نے ہر شہری کو جامع صحت کی سہولیات فراہم کرنے کے لیے حکومت کے عزم کا اظہار کیا۔صحت کے عالمی دن کے موقع پر اپنے پیغام میں انہوں نے اس سال کے موضوع “صحت مند آغاز، امید افزا مستقبل” کو اجاگر کرتے ہوئے نوزائیدہ بچوں کی صحت پر اہم توجہ دینے کی اہمیت پر زور دیا۔ وزیر اعظم نے پاکستان میں زچگی اور بچوں کی صحت میں پیش رفت کو سراہالیکن مزید بہتر کرنے کی ضرورت پر بھی زور دیا۔ انہوں نے زچگی اور نوزائیدہ صحت پر اثر انداز ہونے والے طبی اور سماجی چیلنجوں سے نمٹنے کے لیے صحت کے نظام کو بہتر بنانے کی ضرورت پر زور دیا۔وزیر اعظم نے صحت کے شعبے میں جدید ٹیکنالوجی کے انضمام اور عوامی صحت کی سہولیات کو بہتر بنانے کے لیے مضبوط شراکت داری قائم کرنے کے حکومتی عزم کا اظہار کیا۔ انہوں نے صحت، تعلیم، غذائیت، ماحولیات، اور انتظامیہ کے مربوط شعبہ جاتی نقطہ نظر کی ضرورت پر زور دیا، جو ورلڈ ہیلتھ ڈے 2025 کی تقریبات کا حصہ ہے۔