پارٹی لیڈرشپ نے واضح کر دیا، سندھ کے پانی پر کوئی سمجھوتہ نہیں ہوگا: عاجز دھامرہ

حیدر آباد،10اپریل (پی پی آئی)پاکستان پیپلز پارٹی سندھ کے اطلاعات سیکریٹری سینیٹر عاجز دھامرہ نے 18 اپریل کو حیدرآباد میں ہونے والے جلسے کی تیاریوں کا اعلان کیا ہے، جس میں پی پی پی چیئرمین بلاول بھٹو زرداری شرکت کریں گے۔سینیٹر دھامرہ نے کہا کہ یہ جلسہ تاریخی ہوگا، جہاں سندھ کی عوام دریائے سندھ پر بننے والی کینالوں کے خلاف اپنا فیصلہ دے گی۔ انہوں نے کہا کہ 12 اپریل کو ٹنڈو محمد خان سے ماتلی تک پاکستان پیپلز پارٹی کے صوبائی صدر نثار احمد کھوڑو کی قیادت میں ایک احتجاجی ریلی نکالی جائے گی۔13 اپریل کو ٹنڈو الہ یار سے ایک اور احتجاجی ریلی نکالی جائے گی جو مٹیاری میں اختتام پذیر ہوگی۔ سینیٹر دھامرہ نے کہا کہ سندھ کے پانی کے مسئلے پر پاکستان پیپلز پارٹی کا موقف واضح ہے اور پارٹی کی لیڈرشپ نے پچھلے جلسے میں واضح کر دیا تھا کہ سندھ کے پانی پر کوئی سمجھوتہ نہیں ہوگا۔انہوں نے مزید کہا کہ کسی اور صوبے کے پانی پر بھی ڈاکہ ڈالنے کی اجازت نہیں دی جائے گی۔ سینیٹر دھامرہ نے زور دیا کہ وفاق کو پانی اور کینالوں کے مسئلے کو جلد سے جلد حل کرنا چاہیے، جو کہ فیڈریشن کے مفاد میں ہے۔