وزیراعظم کا زراعت میں خودکفالت پر زور

اسلام آباد، 19اپریل (پی پی آئی) وزیر اعظم محمد شہباز شریف نے پاکستان کے زرعی شعبے کو جدید بنانے کی اہمیت پر زور دیا ہے تاکہ خود کفالت حاصل کی جا سکے۔ اسلام آباد میں ایک اعلیٰ سطح مشاورتی اجلاس کے دوران، وزیراعظم نے شعبے کی پیداوارکو بڑھانے کے لیے نوجوانوں اور تجربہ کار ماہرین دونوں کی صلاحیتوں کو بروئے کار لانے کی ضرورت پر زور دیا۔ انہوں نے کہا کہ پاکستان کی زرخیز زمین اور ہنر مند افرادی قوت ہمارا فخر ہیں۔وزیراعظم کا کہنا تھاکہ زرعی ترقی کے لیے مربوط حکمت عملی کی تشکیل میں اسٹیک ہولڈرز کا کرداراہم ہے۔ اجلاس میں آف سیزن فصلوں کے ذخیرہ کرنے کی سہولتوں اور چھوٹے پیمانے پر قدر میں اضافہ کرنے والے پلانٹس کی کمی پر تشویش کا اظہار کیا گیا۔ وزیراعظم نے نشاندہی کی کہ دیہی علاقوں میں ان کے قیام سے نوجوانوں کو منصوبے شروع کرنے، روزگار کے مواقع پیدا کرنے، اور برآمدات کو بڑھانے میں مدد مل سکتی ہے۔ شرکاء نے ڈیجیٹلائزیشن اور سائنسی اصلاحات کی ضرورت پر زور دیتے ہوئے  کلیدی ترقیاتی شعبوں کی نشاندہی کی۔ تجاویز میں دیہی علاقوں میں اسمارٹ فون تک رسائی کو بہتر بنانا، کسانوں کا مرکزی ڈیٹا بیس بنانا، اور ان پٹ کی فراہمی کے لیے بلاک چین نظام متعارف کروانا شامل تھا۔تحقیق و ترقی میں، توجہ جدید طریقوں کو استعمال کرتے ہوئے مٹی کی زرخیزی کو بڑھانے اور غذائیت سے بھرپور فصلوں کے فروغ کی طرف مبذول کی گئی۔ کسانوں کی صلاحیت کو بڑھانے کے لیے عوامی و نجی شراکت داری کے ذریعے تربیتی پروگراموں کی تجویز پیش کی گئی۔اجلاس اس عزم کے ساتھ اختتام پذیر ہواکہ نوجوانوں کو قومی زرعی ترقی میں شامل کیا جائے گا اور تحقیق کو ترجیح دی جائے گی تاکہ پاکستان کو خود کفالت کی طرف گامزن کیا جا سکے۔