چین کے دورے کے دوران کراچی اور شنگھائی کے میئرز کا شہری ترقی پر تعاون کے فروغ پر اتفاق

کراچی،  اپریل24 (پی پی آئی) چین کے دورے پر موجود میئر کراچی بیرسٹر مرتضیٰ وہاب نے شنگھائی کے میئر گونگ ڑینگ سے ملاقات کی، جس میں کراچی اور شنگھائی کے درمیان دوطرفہ تعلقات کو مضبوط بنانے اور شہری ترقی کے مختلف شعبوں میں تعاون بڑھانے پر تبادلہ خیال کیا گیا۔ملاقات خوشگوار ماحول میں ہوئی جس میں دونوں رہنماؤں نے شہری ترقی، انفراسٹرکچر، پبلک ٹرانسپورٹ، اور ماحولیاتی پائیداری کے شعبوں میں تعاون کے امکانات پر بات چیت کی۔ میئر شنگھائی نے اپنے شہر کے جدید اور مؤثر ٹرانسپورٹ نظام سے متعلق تفصیلات سے آگاہ کیا اور بتایا کہ شنگھائی کا نظام عالمی سطح پر ایک مثالی ماڈل کے طور پر جانا جاتا ہے۔دورے کے دوران بیرسٹر مرتضیٰ وہاب نے شنگھائی ٹرانسپورٹیشن کمانڈ سینٹر کا دورہ بھی کیا، جہاں انہیں ٹریفک مینجمنٹ، ماس ٹرانزٹ سسٹم، اور شہری ٹرانسپورٹ میں جدید ٹیکنالوجی کے استعمال پر جامع بریفنگ دی گئی۔میئر کراچی نے شنگھائی کے شہری ماڈل کو قابل تقلید قرار دیتے ہوئے کراچی میں انفراسٹرکچر اور شہری سہولیات کو بہتر بنانے کے لیے بہترین عالمی تجربات اپنانے کے عزم کا اظہار کیا۔ دونوں رہنماؤں نے ایک دوسرے کے تجربات سے سیکھنے اور بلدیاتی سطح پر روابط کو فروغ دینے پر اتفاق کیا۔دورے کے دوران میئر کراچی، شنگھائی کے اعلیٰ حکام، ٹیکنیکل ماہرین اور بلدیاتی اداروں سے بھی ملاقاتیں کریں گے، تاکہ وہ شنگھائی کے شہری نظام اور انتظامی ڈھانچے کا مشاہدہ براہ راست کر سکیں۔میئر گونگ ڑینگ نے کہا کہ چین اور پاکستان کے درمیان اقتصادی تعاون کو بلدیاتی سطح تک وسعت دینا وقت کی ضرورت ہے، اور دونوں شہروں کو شہری ترقی اور عوامی فلاح کے مشترکہ منصوبوں پر مل کر کام کرنا چاہیے۔ انہوں نے کہا کہ بین الاقوامی سطح پر شہروں کے مابین مسلسل روابط دو طرفہ تعلقات کو مزید مستحکم بنا سکتے ہیں۔بیرسٹر وہاب نے کہا کہ کراچی کو عالمی شہری معیار کے مطابق ترقی دینا اور جدید طرز حکمرانی اپنانا ان کا ہدف ہے، اور شنگھائی جیسے ترقی یافتہ شہروں سے سیکھنا اس مقصد کے لیے کلیدی حیثیت رکھتا ہے۔اس موقع پر میئر شنگھائی نے میئر کراچی کو ایک یادگاری تحفہ بھی پیش کیا جو دونوں شہروں کے درمیان خیر سگالی اور مستقبل میں مضبوط شراکت داری کی علامت ہے۔