کراچی ٹریفک قوانین کی خلاف ورزیوں کے خلاف بڑا کریک ڈاؤن جاری

کراچی،، 24 اپریل  (پی پی آئی) کراچی ٹریفک پولیس نے ٹریفک قوانین کی خلاف ورزیوں کے خلاف ڈپٹی انسپکٹر جنرل ٹریفک کراچی کی سربراہی میں کریک ڈاؤن کا آغاز کیا ہے۔ اس کا مقصد خستہ حال، غیر رجسٹرڈ، اور غیر قانونی گاڑیوں کو سڑکوں سے ہٹانا ہے۔ شہریوں کو قانون کی پاسداری کی طرف راغب کرنے کے لیے شہر بھر میں چیکنگ پوائنٹس قائم کیے گئے ہیں۔ٹریفک پولیس کی کارروائیوں میں فینسی نمبر پلیٹس، رنگین شیشے، غیر معیاری سلنڈرز، اور بغیر ہیلمٹ موٹر سائیکل سواروں کے خلاف کارروائی کی جا رہی ہے۔ صرف وہی موٹر سائیکلیں واپس کی جائیں گی جو درست ڈرائیونگ لائسنس اور ہیلمٹ کے ساتھ ہوں گی۔ خطرناک اور غیر محفوظ گاڑیاں محکمہ ٹرانسپورٹ کی رپورٹ کے بعد ہی واپس کی جائیں گی۔کریک ڈاؤن کے تحت 20,805 موٹر سائیکلیں تحویل میں لی گئیں جبکہ 1,520 فینسی نمبر پلیٹس اور دیگر خلاف ورزیوں کے خلاف کارروائی کی گئی۔ امپاؤنڈ یارڈ میں 350 ہیوی اور لائٹ ٹرانسپورٹ گاڑیاں موجود ہیں جبکہ 25 گاڑیوں کی رجسٹریشن منسوخ کرنے کی سفارش کی گئی ہے۔کمشنر کراچی نے غیر قانونی اضافی سیٹوں والے رکشوں پر 15 اپریل سے 14 جون 2025 تک پابندی عائد کر دی ہے۔ اس دوران 2,250 چالان اور 91 ایف آئی آر درج کی گئی ہیں۔ ان اقدامات کا مقصد حادثات سے انسانی جانوں کا تحفظ ہے۔ترجمان کراچی ٹریفک پولیس نے کہا کہ یہ اقدامات شہریوں کی حفاظت کے لیے ہیں۔