درجہ حرارت میں غیرمعمولی اضافہ، جنوبی پاکستان میں شدید گرمی کا الرٹ جاری

اسلام آباد، 29اپریل (پی پی آئی) محکمہ موسمیات نے ملک کے جنوبی اور وسطی علاقوں میں غیرمعمولی گرمی کی لہر کے پیشِ نظر 30 اپریل تک شدید گرمی کی وارننگ جاری کر دی ہے، جس کے تحت درجہ حرارت معمول سے 5 سے 7 ڈگری سینٹی گریڈ زیادہ رہنے کا امکان ہے۔محکمہ کے مطابق سندھ، جنوبی پنجاب اور بلوچستان میں گرمی کی شدت بڑھنے کا خدشہ ہے، جبکہ وسطی و بالائی پنجاب، اسلام آباد، خیبرپختونخوا، کشمیر اور گلگت بلتستان میں بھی درجہ حرارت معمول سے 4 سے 6 ڈگری سینٹی گریڈ زیادہ ریکارڈ ہونے کی توقع ہے۔ اس دوران میدانی علاقوں میں تیز ہوائیں اور گرد آلود جھکڑ چلنے کا امکان بھی ہے۔گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا، جبکہ جنوبی علاقوں میں شدید گرمی کا زور دیکھا گیا۔ شہید بینظیر آباد میں سب سے زیادہ درجہ حرارت 49 ڈگری سینٹی گریڈ ریکارڈ کیا گیا، جبکہ رحیم یار خان، خیرپور، پڈعیدن، روہڑی اور دادو میں 48 ڈگری سینٹی گریڈ درج کیا گیا۔محکمہ موسمیات نے بدھ کے روز ملک بھر میں گرم اور خشک موسم کی پیش گوئی کرتے ہوئے خبردار کیا ہے کہ سندھ اور جنوبی پنجاب کے بیشتر اضلاع میں گرمی کی شدت میں مزید اضافہ متوقع ہے۔ شام کے وقت بعض علاقوں، خصوصاً بارکھان، ژوب، کشمیر اور گردونواح میں گرج چمک کے ساتھ بارش کا امکان ہے۔محکمہ موسمیات نے عوام، خصوصاً بچوں، بزرگوں اور بیرونِ خانہ کام کرنے والے افراد کو احتیاطی تدابیر اختیار کرنے کی ہدایت جاری کی ہے۔ متوقع گرمی کی شدت کے باعث طبی ماہرین نے بھی شہریوں کو پانی کا زیادہ استعمال کرنے اور دوپہر کے اوقات میں غیر ضروری طور پر گھروں سے باہر نہ نکلنے کا مشورہ دیا ہے۔ماہرینِ موسمیات کا کہنا ہے کہ گرمی کی یہ لہر رواں ہفتے کے اختتام تک برقرار رہ سکتی ہے۔