سندھ حکومت کورنگی انڈسٹریل ایریا کا انفراسٹرکچر بہتر بنا کر عالمی خریداروں کو متوجہ کرے گی، جام اکرام اللہ دھاریجو

کراچی، 30 اپریل  (پی پی آئی)صوبائی وزیر صنعت و تجارت جام اکرام اللہ دھاریجو نے کہا ہے کہ سندھ حکومت کورنگی انڈسٹریل ایریا میں سڑکوں، اسٹریٹ لائٹس، نکاسی? آب اور سیکیورٹی نظام جیسے بنیادی ڈھانچے کو بہتر بنانے کے لیے پْرعزم ہے تاکہ بین الاقوامی خریداروں کو متوجہ کیا جا سکے۔انہوں نے یہ بات منگل کے روز پاکستان ٹینرز ایسوسی ایشن (جنوبی زون) کے دفتر میں دیے گئے ظہرانے میں بطور مہمانِ خصوصی خطاب کرتے ہوئے کہی۔ صوبائی وزیر کا کہنا تھا کہ حکومت نے سرمایہ کار دوست صنعتی پالیسی اختیار کی ہے اور چمڑے کی صنعت کو درپیش مسائل کو ترجیحی بنیادوں پر حل کیا جائے گا۔تقریب میں سیکریٹری صنعت و تجارت محمد یاسین شر بلوچ، چیئرمین پی ٹی اے (جنوبی زون) دانش امان، وائس چیئرمین یوسف شفیق، چیئرمین پی ٹی اے (سینٹرل) حمید ظہور، سینئر رکن اعجاز احمد شیخ، سابق چیئرمین انفراسٹرکچر عزیز احمد اور دیگر شخصیات بھی موجود تھیں۔اس موقع پر چیئرمین دانش امان نے صوبائی وزیر کو چمڑے کی صنعت کو درپیش اہم مسائل سے آگاہ کیا اور ان کے فوری حل پر زور دیا تاکہ اس شعبے کی ترقی اور مسابقت برقرار رکھی جا سکے۔