سکھر بورڈ کے تحت کل سے ہائیر سیکنڈری امتحانات کا آغاز

خیرپور،3 مئی (پی پی آئی)سکھر بورڈ کے تحت پیر 5 مئی سے ہائیر سیکنڈری امتحانات کا آغاز ہو رہا ہے، جس میں ای۔مارکنگ کے نفاذ پر اساتذہ میں شدید بے چینی پائی جاتی ہے۔ اساتذہ کے مطابق، اس تکنیکی تبدیلی کے لیے نہ کوئی باضابطہ تربیت فراہم کی گئی اور نہ ہی کوئی طریقہ کار بتایا گیا۔سندھ حکومت کی طرف سے اعلان کیا گیا تھا کہ ای۔مارکنگ کا نفاذ 2026 میں ہوگا، تاہم اچانک اس کے اطلاق سے اساتذہ اور طلبہ دونوں متاثر ہو سکتے ہیں۔ اس صورت حال کے پیش نظر، پروفیسرز اور لیکچررز کی ایک میٹنگ ہفتہ کے روز خیرپور میں منعقد ہوئی۔میٹنگ میں سندھ پروفیسرز اینڈ لیکچررز ایسوسی ایشن سکھر ریجن کے عہدیداران، بشمول پروفیسر مشتاق پھلپوٹو، پروفیسر لعل بخش سوہو، پروفیسر فدا مہیسر، پروفیسر نجم الحسن، اور پروفیسر اکبر منگریو نے شرکت کی۔ انہوں نے مشترکہ اعلامیہ جاری کرتے ہوئے اپنے خدشات کا اظہار کیا۔اساتذہ کا کہنا ہے کہ E-Marking کے فوری نفاذ سے امتحانات کی شفافیت متاثر ہو سکتی ہے۔ انہوں نے مطالبہ کیا کہ اساتذہ کو مکمل تربیت فراہم کی جائے تاکہ وہ اس نئے نظام کے ساتھ موثر طریقے سے کام کر سکیں۔