بھارتی جارحیت کشمیریوں کی تحریک آزادی کو نہیں دبا سکتی: سلطان محمود چوہدری

اسلام آباد،5مئی (پی پی آئی) صدر آزاد جموں و کشمیر بیرسٹر سلطان محمود چوہدری نے پہلگام واقعہ پر تشویش کا اظہار کرتے ہوئے بھارت کو کشمیریوں کی تحریک آزادی کو دبانے کی کوششوں پر سخت مذمت کی ہے۔ انہوں نے کہا کہ بھارت کی جانب سے فالس فلیگ آپریشن کے ذریعے مظلوم کشمیری عوام پر ظلم و بربریت کی جارہی ہے۔صدر چوہدری نے کہا کہ بھارت کشمیریوں کے جذبہ حریت کو طاقت کے زور پر کچلنے میں ناکام رہا ہے۔ انہوں نے بین الاقوامی برادری سے اپیل کی کہ بھارت کو ایسے جارحانہ اقدامات سے روکا جائے اور مقبوضہ کشمیر میں انسانی حقوق کی پامالی بند کروائی جائے۔آل پارٹیز حریت کانفرنس (آزادکشمیر چیپٹر) کے اجلاس میں صدر چوہدری نے بین الاقوامی سطح پر مسئلہ کشمیر کو اجاگر کرنے کے لیے مزید کوششیں تیز کرنے کا عزم ظاہر کیا۔ کنوینر غلام محمد صفی نے صدر چوہدری کی کوششوں کو سراہا اور مقبوضہ کشمیر کی صورتحال پر تفصیلی بریفنگ دی۔صدر چوہدری نے بھارت کی جانب سے جاری ریاستی دہشت گردی، کشمیری طلباء   پر تشدد اور گھروں کی مسماری پر گہری تشویش کا اظہار کیا۔ انہوں نے کہا کہ کشمیری عوام کے ساتھ ہر ممکن سیاسی، سفارتی اور اخلاقی حمایت جاری رکھی جائے گی۔انہوں نے پاکستان اور بھارت دونوں سے مسئلہ کشمیر کے حل کے لیے سنجیدہ مذاکرات کا آغاز کرنے کی اپیل کی۔ حریت کانفرنس کے وفد نے صدر چوہدری کی جانب سے کشمیری عوام کے ساتھ یکجہتی کے اظہار پر ان کا شکریہ ادا کیا۔