کراچی میں پانی کا بحران شدت اختیار کرگیا،ضلع وسطی میں مظاہرہ

کراچی، 9 مئی (پی پی آئی) کراچی میں پانی کا بحران شدت اختیار کر گیا، نصرت بھٹو کالونی اور نارتھ ناظم آباد کے رہائشیوں نے سخی حسن ہائیڈرینٹ کا محاصرہ کر لیا۔ ضلع وسطی کے ہائیڈرنٹ پر متاثرہ افراد نے احتجاج کیا۔مظاہرین واٹر کارپوریشن کے حکام سے مطالبہ کر رہے تھے کہ پانی کی فوری فراہمی کو یقینی بنایا جائے۔ احتجاج کے دوران مظاہرین نے سخی حسن چورنگی سے واٹر پمپ تک رکاوٹیں کھڑی کرکے اور آگ لگا کر سڑک بلاک کرنے کی کوشش کی جس سے مقامی پولیس اور رینجرز کے اہلکار جائے وقوعہ پر پہنچ گئے۔رینجرز اہلکاروں نے مظاہرین کو سڑک سے ہٹانے کی کوشش کی۔ یہ امر قابل ذکر ہے کہ گزشتہ ہفتے جامعہ کراچی میں واٹر کارپوریشن کی 84 انچ کی لائن پھٹ گئی تھی۔لائن کی مرمت کا کام گزشتہ اتوار کو مکمل کیا گیا تھا لیکن 11 دن گزرنے کے بعد بھی واٹر کارپوریشن شہر کو پانی کی سپلائی بحال کرنے میں ناکام رہی ہے۔