آئی جی پنجاب کی زیر صدارت اجلاس، گوجرانوالہ و شیخوپورہ سی سی ڈی کی کارکردگی کا جائزہ

لاہور، 20 مئی (پی پی آئی)سنٹرل پولیس آفس لاہور میں انسپکٹر جنرل پولیس پنجاب ڈاکٹر عثمان انور کی زیر صدارت کرائم کنٹرول ڈیپارٹمنٹ (سی سی ڈی) گوجرانوالہ اور شیخوپورہ ریجنز کی کارکردگی کا جائزہ اجلاس منعقد ہوا، جس میں ایڈیشنل آئی جی سی سی ڈی سہیل ظفر چٹھہ، ایڈیشنل آئی جی آپریشنز پنجاب شہزادہ سلطان، متعلقہ آر پی اوز، سی پی اوز، ڈی پی اوز اور دیگر سینئر افسران نے شرکت کی۔پنجاب پولیس کے ترجمان کی جانب سے منگل کو جاری کردہ بیان کے مطابق، اجلاس کے دوران گوجرانوالہ اور شیخوپورہ ریجنز کے ریجنل آفیسرز (آر اوز) اور ڈسٹرکٹ آفیسرز (ڈی اوز) نے حاصل کردہ اہداف کے حوالے سے تفصیلی بریفنگ دی۔آئی جی پنجاب ڈاکٹر عثمان انور نے سنگین جرائم کی روک تھام کے لیے کی گئی کارروائیوں پر سی سی ڈی افسران کی کارکردگی کو سراہا۔ انہوں نے سی پی او گوجرانوالہ رانا محمد ایاز، ڈی پی او سیالکوٹ فیصل شہزاد، اور ایس ایس پی سی سی ڈی منصور امان کی کارکردگی کو خصوصی طور پر سراہا۔ڈاکٹر عثمان انور نے کہا کہ آئندہ تین ماہ کے دوران کرائم کنٹرول ڈیپارٹمنٹ کے دفاتر کو جدید انفراسٹرکچر اور سہولیات سے آراستہ کیا جائے گا۔ انہوں نے مزید کہا کہ سی سی ڈی کے بعد پنجاب پولیس میں جلد ہی سائبر کرائم ڈیپارٹمنٹ اور پنجاب ٹورازم پولیس کے قیام کا عمل شروع کیا جائے گا۔آئی جی پنجاب کا کہنا تھا کہ اضلاع کی پولیس اور سی سی ڈی کے درمیان سنگین جرائم کی بیخ کنی کے لیے بہترین کوآرڈینیشن اور ورکنگ ریلیشن شپ موجود ہے، جسے مزید مؤثر بنایا جائے گا تاکہ عوام کو جلد اور مؤثر انصاف فراہم کیا جا سکے۔