ا اگر عمران اپنی ذات کے لئے سیاست کر رہے ہوتے تو جیل سے باہر ہوتے: مسرت چیمہ

لاہور، 25 مئی (پی پی آئی)پاکستان تحریک انصاف کی سینئر رہنما مسرت جمشید چیمہ نے ایک بیان میں کہا ہے کہ عمران خان پاکستانی سیاست کی تاریخ میں جدوجہد کا استعارہ بن گئے ہیں۔ انہوں نے کہا کہ اگر عمران خان اپنی ذات اور مفادات کے لئے سیاست کر رہے ہوتے تو آج جیل سے باہر ہوتے، لیکن انہوں نے قوم کے تابناک مستقبل کے لئے قید و بند کی صعوبتیں جھیلنے کو ترجیح دی ہے۔مسرت چیمہ نے مزید کہا کہ عمران خان کی مقبولیت سے خوفزدہ حکمران انہیں جھوٹے اور بے بنیاد مقدمات میں سلاخوں کے پیچھے رکھنے کی کوشش کر رہے ہیں۔ ان کے مطابق، ملک میں خوف و ہراس کی فضا قائم کر کے حکمران اپنے اقتدار کو طول دینا چاہتے ہیں۔انہوں نے عمران خان کے پیغام کو دہراتے ہوئے کہا کہ پاکستانی قوم کو مایوس نہیں ہونا چاہئے، اور عمران خان پر امید ہیں کہ پاکستان کا مستقبل روشن ہے۔ مسرت چیمہ نے عزم ظاہر کیا کہ ان شا اللہ عمران خان کی قیادت میں پی ٹی آئی دوبارہ اقتدار میں آئے گی اور ملک حقیقی معنوں میں معاشی ترقی کی منازل طے کرے گا۔