حکومت کو بجٹ میں صنعت کی بحالی کے لیے ٹھوس اقدامات کرنے چاہئیں: ہمایوں اختر خان

لاہور، 25 مئی (پی پی آئی)سابق وفاقی وزیر ہمایوں اختر خان نے صنعت کی بندش کو ختم کرنے اور کسانوں کی حالت زار کو بہتر بنانے کے لیے حکومت سے بجٹ میں ٹھوس اقدامات کا مطالبہ کیا ہے۔ ان کا کہنا ہے کہ صنعت کی بحالی سے نہ صرف پاکستان کی آئی ایم ایف سے جان چھوٹ سکتی ہے بلکہ روزگار کے مواقع اور زر مبادلہ کے ذخائر میں بھی اضافہ ہوگا۔ہمایوں اختر خان نے حلقہ این اے 97 کے عمائدین کے وفد سے گفتگو کرتے ہوئے کہا کہ حکومت کو اگلے مالی سال کے بجٹ میں ایسے پروگرام شامل کرنے چاہئیں جو بند صنعتوں کو چلانے میں مددگار ثابت ہوں۔انہوں نے مزید کہا کہ پاکستان میں صنعت کو چلانے کے لیے بنیادی لوازمات جیسے پیٹرو کیمیکل، مشین ٹولز اور سٹیل کی کمی ہے۔ اور پیداواری لاگت بہت زیادہ ہے۔ ہمایوں اختر خان نے دیہی آبادی کی مشکلات کا ذکر کرتے ہوئے کہا کہ کسانوں کی حالت واقعی خراب ہے اور ان کے لیے حکومت کو مزید اقدامات کرنے چاہئیں۔ ان کا کہنا تھا کہ گندم کی قیمت کے حوالے سے توازن ضروری ہے اور مختلف اسکیموں کے ذریعے کسان کو دی جانے والی سبسڈی کے باوجود ان کی حالت پریشان کن ہے۔