ملک کے بیشتر علاقوں میں گرمی کی لہر، متعدد مقامات پر بارش کا امکان

اسلام آباد، 26 مئی (پی پی آئی)ملک کے بیشتر علاقوں میں منگل کے روز موسم گرم اور خشک رہنے کی پیش گوئی کی گئی ہے، تاہم کشمیر، خیبرپختونخوا، اسلام آباد، پنجاب کے بالائی و جنوبی علاقے، شمال مشرقی بلوچستان اور گلگت بلتستان میں مطلع جزوی ابر آلود رہنے کے علاوہ آندھی اور گرج چمک کے ساتھ بارش کی توقع ہے۔ملک کے مختلف حصوں میں پیر کے روز بھی شدید گرمی رہی۔ محکمہ موسمیات کے مطابق مٹھی میں درجہ حرارت 46 ڈگری سینٹی گریڈ جبکہ جیکب آباد، دالبندین، بدین اور چھور میں 45 ڈگری سینٹی گریڈ ریکارڈ کیا گیا۔منگل کو اسلام آباد و گردونواح میں دن کے اوقات میں جزوی ابر آلود موسم رہے گا جبکہ شام یا رات میں آندھی اور بارش کا امکان ہے۔ کچھ مقامات پر موسلادھار بارش یا ڑالہ باری بھی ہو سکتی ہے۔بلوچستان کے کوئٹہ، ڑوب، موسیٰ خیل، سبی اور دیگر اضلاع میں تیز اور گرد آلود ہوائیں چلنے کے علاوہ بارش کی توقع ہے۔پنجاب کے مری، گلیات، راولپنڈی، لاہور اور دیگر مقامات پر بھی شام یا رات کے اوقات میں بارش کی پیش گوئی کی گئی ہے۔خیبرپختونخوا کے پشاور، ایبٹ آباد اور دیگر اضلاع میں بھی جزوی ابر آلود موسم اور بارش کا امکان ہے۔ گلگت بلتستان اور کشمیر میں تیز ہواو?ں اور بارش کی توقع ہے۔محکمہ موسمیات کی جانب سے جاری کردہ پیش گوئی کے مطابق ملک کے بیشتر علاقوں میں گرمی کی لہر جاری رہے گی، جبکہ بعض مقامات پر بارش سے درجہ حرارت میں کمی کی امید ہے۔