کراچی، 3 جنوری 2026 (پی پی آئی): کراچی کے علاقے مائی کلاچی پھاٹک کے قریب مین ہول سے چار افراد کی لاشیں ملنے کے واقعے میں پولیس نے ابتدائی پوسٹ مارٹم حاصل کر لی ہے
پولیس کے مطابق چاروں لاشوں پر تشدد کے واضح نشانات موجود ہیں جبکہ جسموں پر بھاری چیز لگنے کے نشانات بھی پائے گئے ہیں، مرنے والوں میں ایک بزرگ خاتون بھی شامل ہیں، تاہم تاحال چاروں لاشوں کی شناخت نہیں ہو سکی۔
ابتدائی تحقیقات میں انکشاف ہوا ہے کہ لاشوں کو چھپانے کے لیے ایک خشک مین ہول کا استعمال کیا گیا، لاشوں کو مین ہول میں رکھنے کے بعد ان پر کمبل ڈالے گئے اور کمبل کے اوپر بڑے پتھر رکھے گئے تاکہ انہیں نظروں سے اوجھل رکھا جا سکے۔
سول اسپتال میں ضروری کارروائی مکمل ہونے کے بعد، لاشوں کو مزید کارروائی کے لیے حوالے کر دیا گیا۔
چاروں افراد کو اسپتال سے منتقل کرنے کے لیے ایدھی فاؤنڈیشن کی ایمبولینسیں استعمال کی گئیں۔
لاشوں کو اب سہراب گوٹھ کے علاقے میں واقع ایدھی ہوم کے ایدھی سرد خانے میں رکھنے کے لیے پہنچا دیا گیا ہے۔