ابوظہبی (پی پی آئی) متحدہ عرب امارات کے دارالحکومت ابوظہبی میں میڈیا کے بدلتے عالمی رجحانات اور مستقبل سے متعلق تین روزہ گلوبل میڈیا کانگریس کا انعقاد ہوا جس میں پاکستان سمیت دنیا بھر کے ساڑھے پانچ ہزار سے زائد مندوبین اور ایک سو ستر ماہرین نے بطورا سپیکر شرکت کی۔پی پی آئی کے مطابق میڈیا کانگریس میں دنیا میں میڈیا کے بدلتے ہوئے رجحانات، ٹیکنالوجی اور مصنوعی ذہانت کے میڈیا پر اثرات، سوشل میڈیا کے دور میں چیلنجز اور مواقع، ڈس انفارمیشن، کھیلوں اور ماحولیاتی رپورٹنگ کے موضوعات پر ورکشاپس اور مباحثے منعقد ہوئے، میڈیا سے تعلق رکھنے والے 193 عالمی برانڈز نے کانگریس میں اپنے سٹالز لگائے جس میں شرکانے بھرپور دلچسپی ظاہر کی۔پی پی آئی کے مطابق اسٹالز میں میڈیا پروڈکشن، میڈیا مانیٹرنگ، عالمی خبر رساں ادارے اور جدید ایپلی کیشنز تیار کرنے والی کمپنیاں شامل تھیں، کانفرنس میں متحدہ عرب امارات کے وزیر برائے رواداری اور بقائے باہمی شیخ نہیان بن مبارک النہیان، وزیر برائے مصنوعی ذہانت العمر سلطان نے خصوصی شرکت کی۔عالمی کانگریس میں ڈیجیٹل میڈیا ماہرین نے پاکستان سمیت دنیا بھر سے آئے صحافیوں کو ڈیجیٹل رپورٹنگ کی مہارتوں سے متعلق آگاہی دی، تین روزہ ایونٹ میں ماہرین نے اپنے اپنے ممالک میں سوشل میڈیا کے چیلنجز اور روایتی میڈیا کے مستقبل پر روشنی ڈالی، مین سٹریم میڈیا کے بزنس ماڈلز اور اس کے متبادل معاشی ماڈلز پر تفصیلی گفتگو کی گئی۔