حکمران اقتدار کے نشے میں من مانیاں کر رہے ہیں،جلد کڑی گرفت میں آئینگے’ مسرت جمشید چیمہ

لاہور: 26فروری (پی پی آئی) پاکستان تحریک انصاف کے بیان کے مطابق، پارٹی کی سینئر رہنما مسرت جمشید چیمہ نے حکمرانوں پر آئین و قانون کو نظرانداز کرنے کا الزام عائد کیا ہے۔ انہوں نے کہا کہ حکمران اقتدار کے نشے میں من مانیاں کر رہے ہیں جو جلد کڑی گرفت میں آئیں گی۔مسرت جمشید چیمہ نے کہا کہ جیل میں ہونے کے باوجود عمران خان کی مقبولیت کا گراف اوپر جا رہا ہے۔ ان کے مطابق عوام عمران خان کو ایماندار اور سچا لیڈر مانتے ہیں۔انہوں نے مزید کہا کہ حکومتی ٹولہ عوام کے دلوں میں جگہ بنانے کے لیے جبر اور ظلم کے حربے استعمال کر رہا ہے لیکن ناکامی ان کا مقدر ہے۔ عمران خان کے دئیے گئے شعور کی وجہ سے عوام اب حق سچ کی بات کہنے سے نہیں ڈرتے۔مسرت جمشید چیمہ نے کہا کہ حکمران آئین و قانون کو پس پشت ڈال کر من مرضی کے فیصلے کر رہے ہیں لیکن یہ زیادہ دیر نہیں چلے گا۔ عوام اب حقیقت سے آگاہ ہیں اور وہ حکمرانوں سے سوال کر رہے ہیں۔انہوں نے مزید کہا کہ عمران خان آج بھی ملک کے سب سے مقبول سیاسی لیڈر ہیں۔ جیل کی سلاخوں کے پیچھے موجود عمران خان کی مقبولیت کا گراف جس تیزی سے اوپر جارہا ہے اس سے حکمرانوں کی نیندیں حرام ہیں۔