رمضان میں بجلی، گیس اور پانی کی قلت، حکومت گراں فروشی پر قابو پائے: اسداللہ بھٹو

کراچی،3مارچ (پی پی آئی)جماعت اسلامی کے سینئر رہنما اور سابق ایم این اے اسداللہ بھٹو نے رمضان المبارک کے آغاز پر کراچی سمیت سندھ کے دیگر شہروں میں سحری کے وقت گیس کی بندش پر تشویش کا اظہار کرتے ہوئے کہا ہے کہ حکومتی نااہلی کے باعث عوام بنیادی سہولتوں سے محروم ہیں۔یہ بیان جماعت اسلامی کے رہنما کی جانب سے جاری کردہ پریس ریلیز میں دیا گیا۔ اسداللہ بھٹو نے کہا کہ سحر و افطار میں بجلی اور گیس کی بلا تعطل فراہمی کے حکومتی دعووں کے باوجود روزہ دار مشکلات کا سامنا کر رہے ہیں۔ انہوں نے کہا کہ ملک کا وہ صوبہ جو 72 فیصد گیس پیدا کر رہا ہے، وہاں کے عوام کو اس سہولت سے محروم رکھنا ناقابل قبول ہے۔انہوں نے حکومت سے مطالبہ کیا کہ ذخیرہ اندوزی اور گراں فروشی پر قابو پا کر عوام کو ریلیف فراہم کیا جائے۔ ان کا کہنا تھا کہ صوبائی حکومتوں اور متعلقہ اداروں کو بیانات سے آگے بڑھ کر مقامی حکومتوں کے نمائندوں کے ساتھ مل کر پرائس کنٹرول کمیٹیوں کو فعال بنانا چاہیے تاکہ مہنگائی پر قابو پایا جا سکے۔