صارفین کے حقوق کا تحفظ حکومت کی اولین ترجیح ہے: سید مراد علی شاہ

کراچی،15مارچ (پی پی آئی): سندھ کے وزیراعلیٰ سید مراد علی شاہ نے عالمی یومِ صارفین کے موقع پر اپنے پیغام میں حکومت کی جانب سے صارفین کے حقوق کے تحفظ اور پائیدار طرزِ زندگی کی ترویج کو اولین ترجیح قرار دیا ہے۔عالمی یومِ صارفین 2025ء   کی تھیم ‘پائیدار طرزِ زندگی کی طرف ایک درست منتقلی’ پر بات کرتے ہوئے، وزیراعلیٰ نے کہا کہ حکومت صارفین کو معیاری، محفوظ اور سستی خدمات فراہم کرنے کے لیے پْرعزم ہیانہوں نے انتظامیہ کو ہدایت کی کہ وہ مارکیٹ میں قیمتوں کی نگرانی کے لیے خصوصی کمیٹیاں قائم کریں اور غیرمنصفانہ قیمتوں اور مہنگائی کے خلاف سخت اقدامات جاری رکھیں۔وزیراعلیٰ سندھ نے عوام کو اپنے حقوق سے آگاہ رہنے اور کسی بھی خلاف ورزی کی اطلاع دینے کی ترغیب دی۔ انہوں نے کہا کہ سندھ حکومت نے ضلع سطح پر صارفین کے شکایتی مراکز قائم کر دیے ہیں تاکہ شفاف خریداری کا ماحول فراہم کیا جا سکے۔عوامی آگاہی اور حقوق کے تحفظ کے لیے آج کے دن کو اہم موقع قرار دیتے ہوئے، سید مراد علی شاہ نے کہا کہ سندھ حکومت ہمیشہ عوام کے حقوق کے تحفظ کے لیے کام کرتی رہے گی۔ عوام کو معیاری اشیاء   خریدنے اور ناقص مصنوعات کی اطلاع شکایتی مراکز پر دینے کی بھی ترغیب دی گئی ہے۔