ماہرِ نفسیات ڈاکٹر سید ہارون احمد 94 برس کی عمر میں انتقال کر گئے

کراچی،3 اپریل (پی پی آئی)پاکستان کے معروف ماہر نفسیات اور انسانی حقوق کے علمبردار پروفیسر ڈاکٹر سید ہارون احمد 94 برس کی عمر میں طویل علالت کے بعد انتقال کر گئے۔ ان کے انتقال پر میڈیکل اور مینٹل ہیلتھ کمیونٹی سوگوار ہے۔ان کی نماز جنازہ بعد نمازجمعہ مسجد ابوبکر صدیق بلاول چورنگی میں ہوگی، اور تدفین کورنگی ڈیڑھ کریک قبرستان میں ہوگی۔انہوں نے سوگواروں میں اہلیہ، محترمہ انیس ہارون، اور بچے، نادیہ، عدنان، اور عرفان کو چھوڑا ہے۔ ان کی میراث پاکستان اور عالمی سطح پر ماہرین نفسیات کے وسیع نیٹ ورک کے ذریعے جاری ہے۔1931 میں جونپور، اتر پردیش میں پیدا ہونے والے ڈاکٹر ہارون احمد بچپن سے ہی دور اندیش تھے۔ انہوں نے 1950 میں ڈیموکریٹک اسٹوڈنٹس فیڈریشن کی بنیاد رکھی، جس سے ان کی ترقی پسند وکالت کی زندگی بھر کی وابستگی کا آغاز ہوا۔ 1953 میں ایم بی بی ایس کرنے کے بعد انہوں نے برطانیہ کے ماڈزلی ہسپتال میں نفسیات کی تربیت حاصل کی۔پاکستان واپسی پر ڈاکٹر ہارون نے نفسیات کے شعبے کو ازسرنو تشکیل دیا۔ جناح ہسپتال کے وارڈ 20 میں سینئر ماہرِ نفسیات کے طور پر انہوں نے نفسیاتی نگہداشت کی ترقی میں اہم کردار ادا کیا۔ انہوں نے 1972 میں پاکستان سائیکاٹرک سوسائٹی کی مشترکہ طور پر بنیاد رکھی اوراس سے قبل 1965 میں پاکستان ایسوسی ایشن فار مینٹل ہیلتھ (PAMH) قائم کی، جس کے ذریعے ان آبادیوں تک ذہنی صحت کے علاج کی سہولت فراہم کی گئی جہاں ذہنی صحت کے طبی مراکز نہیں تھے۔1995 میں، PAMH نے کراچی میں انسٹی ٹیوٹ آف بی ہیوریل سائنسز کا آغاز کیا، جو کہ ایک معروف نفسیاتی سہولت ہے جو جدید علاج اور تربیت سے آراستہ ہے۔ ڈاکٹر ہارون نے “ذہنی صحت دہلیز پر” کے نعرے کے ساتھ شعبہ نفسیات کوترقی دی۔ ڈاکٹر ہارون امن اور انسانی حقوق کے بھی پرجوش حامی تھے۔ انٹرنیشنل فزیشنز فار دی پریوینشن آف نیوکلیئر وار کے صدر کی حیثیت سے انہوں نے 1998 میں پاکستان کے جوہری ہتھیاروں کی مخالفت کی اور ان کی پاکستان کمیشن برائے انسانی حقوق کے ساتھ طویل وابستگی رہی۔ان کی سب سے زیادہ اثر انگیز شراکتوں میں سے ایک ذہنی صحت کے قانون کی اصلاح تھی۔ 1912 کے پرانے Lunacy Act کو تسلیم کرتے ہوئے انہوں نے 2013 کے سندھ مینٹل ہیلتھ ایکٹ کے نفاذ کی کوششوں کی قیادت کی، جس نے نفسیاتی بیماریوں کے شکار افراد کو تحفظ فراہم کیا۔ ڈاکٹر ہارون کی زندگی خدمت اور انصاف کا مینار تھی، اور ان کی پیشہ ورانہ تعلیمات آئندہ نسلوں پر گہرا اثر ڈالتی رہیں گی۔ ان کی رحلت نے خلا پیدا کردیا ہے،لیکن ان کی میراث یعنی ملک اور دنیا بھر میں پھیلے ماہرنفسیات ان کی لیگیسی برقرار رکھیں گے۔