نہری منصوبہ مسترد،وزیراعلی سندھ کا کراچی پہنچنے پر شاندار استقبال

کراچی،29اپریل (پی پی آئی) وزیراعلیٰ سندھ سید مراد علی شاہ اسلام آباد میں مشترکہ مفادات کونسل (سی سی آئی) کے اجلاس میں سندھ کا موقف کامیابی سے پیش کرنے کے بعد منگل کو کراچی واپس پہنچ گئے۔ وزیراعلیٰ کے ترجمان کے بیان کے مطابق،کراچی ایئرپورٹ کے اولڈ ٹرمینل پرمراد علی شاہ کا آمد پر صوبائی وزراء اراکین قومی و صوبائی اسمبلی، پارٹی رہنماؤں اور کارکنوں کی بڑی تعداد نے ان کا پرتپاک استقبال کیا۔ اس موقع پرفضاء”جئے بھٹو” اور “جئے بلاول” کے نعروں سے گونج اٹھی۔ اولڈ ٹرمینل پر استقبال کیلئے آئے عوام سے خطاب کرتے ہوئے، مراد علی شاہ نے کامیابی کی وجہ اللہ کی مدد، پاکستان پیپلز پارٹی کے چیئرمین بلاول بھٹو زرداری کی رہنمائی، اور پیپلز پارٹی اور عوام کی اجتماعی طاقت کو قرار دیا۔ انہوں نے سندھ اور پاکستان کے عوام کو مبارکباد دیتے ہوئے اعلان کیا کہ مستقبل میں کوئی بھی نہری منصوبہ باہمی رضامندی کے بغیر آگے نہیں بڑھے گا۔وزیراعلیٰ نے ریمارکس دیئے کہ بعض عناصر کا مقصد صوبوں کے درمیان انتشار پھیلانا اور عوام کو گمراہ کرنا ہے۔ انہوں نے کہا کہ سندھ حکومت نے شروع سے ہی متنازع نہری منصوبوں پر ایک مضبوط اور واضح موقف برقرار رکھا ہے، اس بات کو یقینی بناتے ہوئے کہ اس معاملے کا قومی سطح پر مؤثر طریقے سے مقابلہ کیا جائے۔مراد علی شاہ نے مزید وضاحت کی کہ سی سی آئی اجلاس کے دوران، نگران حکومت کا ارسا سے متعلق جاری کردہ سرٹیفکیٹ کو منسوخ کر دیا گیا، اور قومی اقتصادی کونسل کی ایگزیکٹو کمیٹی (ایکنیک) کی جانب سے کیے گئے پہلے فیصلے کو بھی کالعدم قرار دے دیا گیا۔ انہوں نے زور دے کر کہا کہ پارٹی نے شروع سے ہی متنازع منصوبے کی مسلسل مخالفت کی۔وزیراعلیٰ نے اس مسئلے کے حل میں چیئرمین بلاول بھٹو زرداری کی وزیراعظم شہباز شریف سے ملاقات کو اہم قرار دیا۔ انہوں نے سی سی آئی میں سندھ کے جائز موقف کی توثیق کرنے پر وزیر اعظم شہباز شریف کا شکریہ ادا کیا اور دیگر تینوں صوبوں کے وزرائے اعلیٰ کا بھی ان کی حمایت پر شکریہ ادا کیا۔اپنے خطاب کے اختتام پر، شاہ نے سندھ کے عوام کو صوبائی قیادت پر ان کے غیر متزلزل اعتماد کے لیے ان کی تعریف کی۔