سندھ میں پلاسٹک بیگز پر مکمل پابندی کا اعلان

کراچی، 5 مئی (پی پی آئی) حکومت سندھ نے ماحولیاتی آلودگی کے خاتمے کی جانب ایک انقلابی قدم اٹھاتے ہوئے صوبے میں پلاسٹک شاپنگ بیگز پر مکمل پابندی کا اعلان کیا ہے۔ محکمہ ماحولیات کی جانب سے جاری نوٹیفکیشن کے مطابق 15 جون سے نان ڈیگریڈیبل، اوکسو ڈیگریڈیبل، بلیک اور ری سائیکلڈ پلاسٹک بیگز پر پابندی عائد ہوگی۔محکمہ ماحولیات، موسمیاتی تبدیلی و ساحلی ترقی کی جانب سے جاری کردہ بیان میں کہا گیا ہے کہ اس پابندی کا مقصد ماحولیاتی تحفظ کو یقینی بنانا ہے۔ 2019 کی جزوی پابندی کے بعد یہ مکمل پابندی سندھ پروہیبیشن آف نان ڈیگریڈیبل پلاسٹک پروڈکٹس رولز 2014 میں ترمیم کے تحت نافذ کی گئی ہے۔سیکریٹری ماحولیات نے واضح کیا ہے کہ صرف ماحول دوست بیگز کی اجازت ہوگی۔ آغا شاہنواز نے کہا کہ پلاسٹک بیگز ماحولیاتی تباہی کی بنیاد ہیں اور اس حوالے سے زیرو ٹالرنس اپنائی جائے گی۔انہوں نے خبردار کیا کہ اس اعلان پر عملدرآمد کو یقینی بنایا جائے گا اور خلاف ورزی کرنے والوں کے خلاف سخت کارروائی کی جائے گی۔ سندھ حکومت نے عوام سے تعاون کی اپیل کرتے ہوئے ماحولیاتی تحفظ کو قومی ذمہ داری قرار دیا ہے۔