سندھ میں غیر فعال آر او پلانٹس کی بحالی کا آغاز، مٹھی اور چھاچھرو کے پلانٹس فعال

کراچی،5مئی (پی پی آئی) وزیر اعلیٰ سندھ کے معاون خصوصی برائے پبلک ہیلتھ انجینئرنگ و دیہی ترقی محمد سلیم بلوچ کی کاوشوں سے مٹھی شہر میں سب سے بڑے غیر فعال آر او پلانٹ اور چھاچھرو پلانٹ کو فعال کردیا گیا ہے۔ محمد سلیم بلوچ کی خصوصی ہدایت پر مٹھی آر او پلانٹ کی بحالی کے بعد ان علاقوں میں جہاں پانی کی لائنیں موجود نہیں ہیں، روزانہ کی بنیاد پر صاف پانی کی فراہمی ممکن بنائی جارہی ہے۔ انھوں نے متعلقہ ایکسیئن انجینئر محمد فرخ اور ان کی ٹیم کی کاوشوں کو سراہتے ہوئے دیگر غیر فعال آر او پلانٹس کی جلد بحالی کی ہدایت بھی دی۔ محمد سلیم بلوچ نے بتایا کہ چیئرمین پیپلز پارٹی بلاول بھٹو زرداری کی خصوصی ہدایت ہے کہ تھرپارکر، مٹھی، اسلام کوٹ اور دیگر دورافتادہ علاقوں میں پانی کی فراہمی یقینی بنائی جائے۔ انھوں نے کہا کہ سندھ حکومت عوام سے کیے گئے وعدوں کی تکمیل کے لیے پرعزم ہے اور جلد ہی تمام وعدے پورے کیے جائیں گے۔