پاکستانی امن کے خواہاں ہیں لیکن عزت و ناموس کی حفاظت کو اولین ترجیح دیں گے: ڈاکٹر فوزیہ صدیقی

کراچی، 8مئی (پی پی آئی) معروف نیورولوجسٹ اور ایپی لیپسی فاونڈیشن و گلوبل عافیہ موومنٹ کی سربراہ ڈاکٹر فوزیہ صدیقی نے بھارتی جارحیت کی مذمت کرتے ہوئے پاکستان کے دفاع کے لئے قوم کو متحد ہونے کی ضرورت پر زور دیا ہے۔ڈاکٹر فوزیہ صدیقی نے بیان دیا کہ پاکستانی عوام امن کے خواہاں ہیں لیکن وطن کا دفاع اور عزت و ناموس کی حفاظت کو اولین ترجیح دیں گے۔ بھارتی جارحانہ کارروائیوں کے بعد دفاع وطن کی اہمیت بڑھ گئی ہے۔عافیہ موومنٹ نے اعلان کیا کہ وہ اپنی معمول کی سرگرمیوں کے ساتھ ساتھ قومی یکجہتی کے فروغ کے لئے بھی کام کرے گی۔ ڈاکٹر عافیہ کی وطن واپسی کو مادر وطن کے تحفظ کی طرح اہم قرار دیا گیا ہے۔موومنٹ کا مقصد ڈاکٹر عافیہ کو وطن واپس لاکر قومی وقار بحال کرنا ہے۔ اس وقت پاک فوج اور حکومت بھارت کی جارحیت سے ملک کو بچانے کی کوشش کر رہی ہیں، ان کی حمایت ہر محب وطن پاکستانی کا فرض ہے۔عافیہ موومنٹ نے زور دیا کہ حکومت، آرمی چیف، پارلیمنٹ اور تمام سیاسی جماعتوں کو یاد دلائیں گے کہ ڈاکٹر عافیہ قوم کی بیٹی ہیں اور ان کی عزت کی حفاظت مادر وطن کی طرح فرض ہے۔ حکومتوں نے اگر یہ فرض ادا کیا ہوتا تو کوئی پاکستان کی طرف میلی آنکھ سے نہ دیکھ سکتا۔