اسلام آباد میں جنسی زیادتی اور ڈکیتی کے ملزم کو ریکارڈ وقت میں گرفتار کر لیا گیا

اسلام آباد، 8مئی (پی پی آئی) اسلام آباد پولیس نے مؤثر کارکردگی کا مظاہرہ کرتے ہوئے جنسی زیادتی اور ڈکیتی کے ملزم کو جرم کی اطلاع کے صرف 51 گھنٹے بعد گرفتار کر لیا۔ ایک غیر ملکی خاتون نے چند روز قبل پولیس سے رجوع کیا تھا اور اپنی روداد بیان کی جس میں انہیں زیادتی کا نشانہ بنایا گیا اور ان کاقیمتی سامان لوٹ لیاگیاتھا۔ شکایت موصول ہونے پر، انسپکٹر جنرل آف پولیس اسلام آباد، سید علی ناصر رضوی نے فوری طور پر اعلیٰ سطح تحقیقات کا آغاز کیا۔ ڈی آئی جی اسلام آباد محمد جواد طارق کی قیادت میں ٹیم نے جدید ٹیکنالوجی اور فرانزک شواہد، بشمول سی سی ٹی وی فوٹیج اور جیو فینسنگ، کا استعمال کرتے ہوئے ملزم کا سراغ لگایا۔متاثرہ خاتون نے بعد میں ملزم کی شناخت کی اور پولیس کی فوری اور مؤثر کارروائی پر شکریہ ادا کیا۔ آئی جی پی رضوی نے پولیس ٹیم کی کارکردگی کی تعریف کرتے ہوئے افسران کی پیشہ ورانہ مہارت اور ٹیم ورک کو سراہا۔انہوں نے اس بات پر زور دیا کہ شہریوں کی جان و مال کا تحفظ اسلام آباد پولیس کی اولین ترجیح ہے اور یقین دلایا کہ ملزم کے خلاف قانونی کارروائیاں جاری ہیں تاکہ زیادہ سے زیادہ سزا کو یقینی بنایا جا سکے۔ انہوں نے کہا کہ یہ کیس اسی نوعیت کے جرائم کے خلاف ایک مثالی کیس بنے گا۔