صوبائی وزیر اکرم اللہ دھاریجو اور بریگیڈیئر کا ضیا الدین ہسپتال کا دورہ: فیاض جعفری کی عیادت

سکھر، 12 مئی (پی پی آئی)  صوبائی وزیر صنعت و تجارت سندھ جام اکرم اللہ دھاریجو اور کمانڈنٹ 34 ونگ بریگیڈیئر اسد نے ضیاالدین ہسپتال سکھر کا دورہ کیا جہاں انہوں نے ڈرون حملے میں زخمی ہونے والے فیاض جعفری کی عیادت کی۔ جام اکرم اللہ دھاریجو اور بریگیڈیئر اسد نے فیاض جعفری کو پھولوں کا گلدستہ پیش کیا اور ان کی جلد صحتیابی کی دعا کی۔ اس موقع پر کمشنر سکھر فیاض حسین عباسی، ڈی آئی جی فیصل عبداللہ چاچڑ، اور دیگر سرکاری افسران بھی موجود تھے۔دورے کے دوران صوبائی وزیر اور بریگیڈیئر اسد نے ہسپتال کے ڈاکٹروں سے فیاض جعفری کی صحت کے بارے میں معلومات حاصل کیں اور ان کے بہترین علاج کی ہدایت کی۔ بریگیڈیئر اسد نے کہا کہ افواج پاکستان ملک کے دفاع کے لیے ہر وقت تیار ہیں۔جام اکرم اللہ دھاریجو نے کہا کہ حکومت اور قانون نافذ کرنے والے ادارے اس قسم کے واقعات کو روکنے کے لیے مستعد ہیں۔ انہوں نے مزید کہا کہ بھارت کی جنگی جارحیت میں شہید ہونے والوں کے ورثاء   کو مالی امداد فراہم کی جائے گی۔زخمی بچے فیاض جعفری کے والد نے کہا کہ وہ ملک کے لیے اپنے تمام بیٹوں کی قربانی دینے کے لیے تیار ہیں۔ پاکستان آرمی کی جانب سے زخمی بچے کے خاندان کو مالی امداد اور راشن فراہم کیا گیا جبکہ بچے کی تعلیم کے لیے بھی مدد کا یقین دلایا گیا۔