میدان جنگ میں حاصل کامیابی کو مذاکرات کی میز پر ضائع نہیں ہونے دیں گے: الطاف شکور

کراچی،13مئی (پی پی آئی)  پاسبان ڈیموکریٹک پارٹی کے چیئرمین الطاف شکور نے واضح کیا ہے کہ جنگ کے میدان میں حاصل کی گئی کامیابی کو مذاکرات کی میز پر ضائع نہیں ہونے دیا جائے گا۔ انہوں نے ملک میں طاقت کی بجائے سیاسی حکمت عملی اپنانے پر زور دیا۔الطاف شکور نے کہا کہ ایشیا اور امت مسلمہ کی لیڈرشپ کا سنہری موقع پاکستان کے پاس موجود ہے، اور اس کے لئے قائدین کو غوروفکر کے بعد حکمت عملی وضع کرنی چاہیے۔ انہوں نے خبردار کیا کہ معمولی قسم کے سیاست دانوں کو آگے لا کر اس موقع کو ضائع نہ کیا جائے۔انہوں نے مزید کہا کہ مغرب ہندوستان سے مایوس ہوا ہے، اور پاکستان کو اس سنہری موقع کا فائدہ اٹھانا چاہیے۔ مگر یہ ترقی امن و امان کے قیام کے بغیر ممکن نہیں۔ تمام اسٹیک ہولڈرز کو ترقی کی دوڑ میں شامل ہونے کا موقع ملنا چاہیے۔الطاف شکور نے کشمیر اور پانی کے معاملے میں بھارت کے ساتھ ڈٹ کر مذاکرات کرنے کی ضرورت پر زور دیا اور پاکستان کو شملہ معاہدہ ختم کرنے کا اعلان کرنے کا مشورہ دیا۔ انہوں نے سیاسی نظام کی تشکیل نو کی ضرورت پر بھی زور دیا تاکہ ہر شہری انتخابات میں حصہ لے سکے۔شکور نے مزید کہا کہ ملک دشمن بیانیہ دم توڑ چکا ہے اور سیاست دانوں پر یہ ذمہ داری عائد ہوتی ہے کہ وہ ملک کی سلامتی اور استحکام کے لیے متحد رہیں۔ انہوں نے وزیر اعظم پاکستان کو امریکی صدر ٹرمپ کا بار بار شکریہ ادا کرنے سے باز رہنے کا بھی مشورہ دیا۔