کم عمری کی شادی بل شریعت محمدی ﷺ کے خلاف: قاری یعقوب شیخ

لاہور، 20 مئی (پی پی آئی)  پاکستان مرکزی مسلم لیگ کے جوائنٹ سیکرٹری اور علماء   و مشائخ ونگ کے چیئرمین قاری محمد یعقوب شیخ نے کم عمری کی شادی کی ممانعت کے بل کو شریعت محمدیﷺ، قرآن و سنت اور اسلامی خاندانی نظام پر حملہ قرار دیا ہے۔ ان کا کہنا تھا کہ شریعت کے مطابق نکاح کے لیے عمر کی نہیں بلکہ بلوغت کی شرط رکھی گئی ہے۔قاری یعقوب شیخ نے اس بل میں شامل سزاؤں جیسے نکاح پڑھانے پر قید، جرمانے، اور والدین و سرپرستوں کو مجرم قرار دینے کو افسوسناک اور اسلام مخالف رویہ قرار دیا۔ انہوں نے کہا کہ ایسے قوانین نکاح کو جرم قرار دے کر معاشرتی بگاڑ کو فروغ دے رہے ہیں۔انہوں نے مزید کہا کہ اسلامی معاشرہ نکاح کے ذریعے طہارت اور تحفظ کو یقینی بناتا ہے، جبکہ یہ قانون معاشرتی بگاڑ کو بڑھاوا دے رہا ہے۔ قاری یعقوب شیخ نے مطالبہ کیا کہ بل کو فی الفور واپس لیا جائے اور کسی بھی قانون سازی کو اسلامی نظریاتی کونسل کی منظوری سے مشروط کیا جائے۔ انہوں نے متنبہ کیا کہ پاکستان مرکزی مسلم لیگ دینی و سیاسی جماعتوں کے ساتھ مل کر آئندہ کا لائحہ عمل طے کرے گی اگر بل واپس نہ لیا گیا۔