اوکاڑہ، 21-اکتوبر-2025 (پی پی آئی): ایک ٹریفک حادثے میں دو موٹر سائیکل سوار جان کی بازی ہار گئے۔ تفصیلات کے مطابق، منگل کی صبح موضع گنگوال کے رہائشی محمد اسلم اور محمد صدیق دھارمی والا سے موٹر سائیکل پر سوار تھے جب وہ سڑک کے کنارے کھڑے ٹرالر سے ٹکرا گئے۔ حادثہ اس وقت پیش آیا جب ٹرالر کی بیک لائٹ بند تھی اور موٹر سائیکل سوار اندھیرے میں اسے دیکھ نہیں سکے۔
عینی شاہدین کے مطابق تصادم اتنا شدید تھا کہ دونوں افراد موقع پر ہی دم توڑ گئے۔ اطلاع ملنے پر ریسکیو ٹیمیں اور پولیس کی بھاری نفری موقع پر پہنچی اور لاشوں کو قریبی ہسپتال منتقل کیا۔ پولیس نے حادثے کی تحقیقات شروع کر دی ہیں جبکہ ٹرالر کا ڈرائیور موقع سے فرار ہونے میں کامیاب ہو گیا۔