پاکستان حیاتیاتی تنوع سے مالا مال خطہ ارض ہے: نمائندہ اقوام متحدہ تمام اسٹیک ہولڈرز کو اس کے تحفظ کے لیے اپنا کردار ادا کرنے کی ضرورت ہے دریائے سندھ کو ماحولیاتی آلودگی سے بچانے پر کام کررہے ہیں:رولے فلورنس

کراچی (پی پی آئی)اقوام متحدہ کا ادارہ برائے خوراک و زراعت حکومت پاکستان کے ساتھ مل کر دریائے سندھ کے علاقے کو ماحولیاتی آلودگی سے بچانے کے ایک منصوبے پر کام کر رہا ہے۔پی پی آئی کے مطابق یہ بات تنظیم کی نمائندہ رولے فلورنس نے ریڈیوپاکستان کے انگریزی چینل کے پروگرام ایف ایم 87.6 میں گفتگو کے دوران بتائی رولے فلورنس نے کہا کہ دریائے سندھ کے علاقے کی انسانی زندگیوں اور ملک کی کثیرجہتی میں اہم کردار ہے جس میں لوگوں کی سماجی، اقتصادی اور ثقافتی سرگرمیاں شامل ہیں۔اقوام متحدہ کے ادارہ برائے خوراک کی نمائندے نے کہا کہ پاکستان حیاتیاتی تنوع سے مالا مال خطہ ارض ہے اور تمام اسٹیک ہولڈرز کو اس کے تحفظ کے لیے اپنا کردار ادا کرنے کی ضرورت ہے۔ انہوں نے ملک میں پانی اور زمینی وسائل کے تحفظ کے لیے ٹھوس اقدامات پر زور دیا۔زراعت کے شعبے میں تحقیق کی اہمیت کو اجاگر کرتے ہوئے، ایف اے او کی نمائندے نے کارکردگی اور پیداواری صلاحیت کو بڑھانے کے لیے زرعی شعبے میں اصلاحات کی ضرورت پر زور دیا۔پاکستان کے سیلاب سے متاثرہ علاقوں میں ایف اے او کی کوششوں کے بارے میں، فلورنس رولے نے کہا کہ یہ تنظیم کسانوں کو گندم کی کاشت کے لیے ربیع کے پیکجز، مویشیوں کے لیے ویکسین اور مویشیوں کے لیے چارہ فراہم کر رہی ہے۔