لاہور، 25 جون (پی پی آئی): نائب وزیراعظم اور وزیر خارجہ اسحاق ڈار نے کہا ہے کہ ایران اور امریکہ کے درمیان کامیاب ثالثی کے بعد پاکستان دنیا میں ایک امن پسند اور مصالحت کار ملک کے طور پر ابھرا ہے۔
لاہور میں آج میڈیا سے گفتگو کرتے ہوئے انہوں نے کہا کہ پاکستان وہ پہلا ملک تھا جس نے ایران پر حملے کی مذمت کی اور جنگ کے خاتمے کے لیے عملی کوششیں بھی کیں۔
نائب وزیراعظم نے کہا کہ پوری قوم اس عزت و وقار پر شکر گزار ہے جو پاکستان کو ثالثی کے عمل کے دوران حاصل ہوا۔ انہوں نے کہا کہ پاکستان نے مصالحتی کوششوں کا آغاز کرکے خطے میں امن اور استحکام کو یقینی بنانے میں اہم کردار ادا کیا۔
اسحاق ڈار نے کہا کہ وزیراعظم نے سابق حکومت کے غلط معاشی فیصلوں کی اصلاح کے لیے مؤثر اقدامات کیے ہیں، جس کے نتیجے میں ملک کو ترقی کی راہ پر گامزن کر دیا گیا ہے۔
انہوں نے کہا کہ پاکستان ایک ذمہ دار ایٹمی طاقت ہے اور اب ملک کو ایک مضبوط معاشی طاقت بنانے کے لیے اقدامات کیے جا رہے ہیں۔